काठमाडौं (हाम्रो खेलकुद) – अन्तर्राष्ट्रिय क्रिकेट रंगशाला बनाउने महत्वकांक्षी योजना अगाडि सारेको धुर्मुश–सुन्तली फाउन्डेसनलाई चितवन जिल्ला क्रिकेट संघले आर्थिक सहयोग प्रदान गरेको छ ।
भरतपुरमा आइतबार रंगशाला बनाउनका लागि डीपीआर घोषणा कार्यक्रममा चितवन जिल्ला क्रिकेट संघका कोषाध्यक्ष भरत कुँवरले संघका तर्फबाट फाउन्डेसनका अध्यक्ष सिताराम कट्टेललाई २ लाख ५५ हजार ५ सय ५५ रुपैंयाको चेक हस्तानतरण गरे ।
झन्डै ३ अर्बको लागतमा भरतपुर महानगरपालिकाले क्रिकेट रंगलशाला उपलब्ध गराएको २० बिघा, ६ कठ्ठा जग्गामा अन्तर्राष्ट्रिय रंगशाला निर्माणको आइतबार भरतपुरमा डीपीआर घोषणा कार्यक्रम गरिएको थियो ।
चितवन जिल्ला क्रिकेट संघका अध्यक्ष कैलाश प्रधानले धुर्मुश–फाउन्डेसनले यत्रो ठुलो योजना चितवनमै ल्याउदा आफुहरुले सानो सहयोग गरेको जनाए । त्यस्तै जिल्ला क्रिकेट संघका सदस्य सुदिप पियाले फाउन्डेसनलाई संघको पूर्ण सहयोग रहने जनाए । चितवन जिल्ला क्रिकेट संघले यसअघि धनगढीमा क्रिकेट रंगशाला बनाउन ‘ड्रिम फाप्ला’ अभियानमा ५० हजार सहयोग गरेको थियो ।
