काठमाडौं (हाम्रो खेलकुद) – सरकारले हालै संयुक्त अरब इमिरेट्स (युएई) सँगको वान डे र टि ट्वान्टी सिरिज जित्ने नेपाली क्रिकेट टोलीलाई नगदसहित पुरस्कृत गर्ने भएको छ । तीन वान डे र तीन टि ट्वान्टी समान २–१ ले जितेर १० दिन अघि स्वदेश फर्केको नेपाली टोलीले वान डे मान्यता पाएयता जितेको पहिलो श्रृखंला थियो ।
मन्त्री परिषद्को माघ २५ गते बसेको बैठकेले क्रिकेट टोलीका खेलाडीलाई जनही ५ लाख रुपैयाँ , प्रशिक्षकलाई ३ लाख र टोलीका अन्य सदस्यलाई जनही २ लाख रुपैयाँ दिने निर्णय गरेको सरकारका प्रवक्ता गोकुल बास्कोटाले जनाएका छन् ।
क्रिकेट टोलीसँगै सरकारले झन्डै तीन वर्षअघि १२ औं दक्षिण एसियाली खेलकुद (साग) को स्वर्ण पदक जित्ने नेपाली यू २३ फुटबल टोलीका सदस्यलाई थप ३ लाख रुपैयाँ दिने निर्णय गरेको छ । सरकारले यसअघि फुटबल टोलीका सागका अन्य पदक विजेता खेलाडीका साथ जनही २ लाख रुपैयाँ उपलब्ध गराएको थियो । तत्कालिन युवा तथा खेलकुद मन्त्री सत्यनारायण मण्डलले सागमा स्वर्ण जित्ने फुटबल टोलीका सदस्यलाई ५ लाख रुपैयाँ दिने घोषणा गरेका थिए । सन् २०१६ मा नेपालले भारतलाई हराउँदै सागको उपाधि जितेको थियो ।
मन्त्री परिषद्ले शारीरिक सुगठनका विश्व विजेता महेश्वर महर्जन ५ लाख रुपैयाँ दिने निर्णय गरेको छ । क्रिकेट, फुटबल र शारीरिक सुगठनका खेलाडीलाई गरि सररकाले १ करोड ५६ लाख रुपैयाँ प्रदान गर्ने निर्णय गरेको हो ।
