धनगढी (हाम्रो खेलकुद) – तेस्रो संस्करणको धनगढी प्रिमियर लिग (डिपिएल) को ११ औं खेलमा आईतबार सीवाईसी अत्तरियाले महेन्द्रनगर युनाइटेडलाई ५५ रनको लक्ष्य दिएको छ ।

अघिल्लो दिनको निरन्तर वर्षाले मैदान गिलो हुँदा निकै ढिला सुरुभएको खेल ६ ओभरमा घटाईएको थियो । टस जितेर पहिला ब्याटिङ थालेको अत्तरियाले ६ ओभरमा ५ विकेटको क्षतिमा ५४ रन बनायो ।

अत्तरियाका लागि ओपनर सन्नी पटेलले ११ बलमा २ छक्का सहित १९ रनमा आउट भए । जय किशन कोल्सावालाले १० रन बनाए । सन्दीप जोरा ४ रनमा आउट भए । दिपेन्द्र सिंह ऐरी १० रनमा आउट भए । भुवन कार्की र रित गौतम समान ४ रनमा अविजित रहे ।

अत्तरियाले पहिलो र दोस्रो ओभरमा समान ११ रन जोड्यो । तेस्रो ओभरको चौथो बलमा सागर ढकालले सन्नी पटेललाई विकेटकीपर दिलिप नाथबाट क्याच गराए । लगतै पाँचौ बलमा सागरले अर्का ओपनर कोल्सावालालाई रोहित कुमार पौडेलबाट क्याच गराए । अत्तरिायले तेस्रो ओभरमा २ विकेट गुमाउँदै ९ रन जोड्यो । चौथो ओभरमा ५ रन जोड्यो ।

पाँचौ ओभरको पहिलो बलमै जोरा क्याच आउट भए । अभिनास बोहोराले आरिफ शेखबाट क्याच गराए । लगतै यसै ओभरको तेस्रो बलमा कमलसिंह ऐरी शून्यमा क्याच आउट भए । अत्तरियाले पाँचौ ओभरमा दुई विकेट गुमाउँदै ८ रन जोड्यो । अन्तिम ओभरमा १ विकेट गुमाउँदै १० जोड्न सफल भयो ।

महेन्द्रनगरका सागर ढकालले १ ओभरमा ९ रन खर्चेर दुई विकेट लिए । त्यस्तै अभिनास बोहोराले २ ओभरमा १९ रन खर्चेर २ विकेट लिए । शरद भेषवाकरको नाममा १ विकेट रह्यो ।