धनगढी (हाम्रो खेलकुद) – रुपन्देही च्यालेन्जर्स तेस्रो संस्करणको धनगढी प्रिमियर लिग (डिपिएल) को १२ औं खेलमा काठमाडौं गोल्डेन्ससँग लज्जास्पद हार बेहोरेको छ ।

आइतबार भएको खेलमा रुपन्देही काठमाडौंसँग १ सय रनले पराजित भएको छ । १ सय ३४ रनको लक्ष्य पछ्याएको रुपन्देहीले १५.१ ओभरमा अलआउट हुँदै ३३ रनमा समेटियोे । जारी डिपिएलमा यो सबै भन्दा कम स्कोर हो ।

जारी डिपिएलमा काठमाडौंको यो सर्वाधिक फराकिलो अन्तरको जित पनि हो । लक्ष्य पक्ष्याउने क्रममा ९.१ ओभरमा रुपन्देही २१-७ को दयनिय अवस्थामा पुगेको थियो । रुपन्देहीका कुनै पनि ब्याट्समयानले दोहोरो अंकमा रन जोड्न सकेनन् । रुपन्देहीका लागि सुमित महर्जनले बनाएको ५ रन नै सर्वाधिक रन बन्न पुग्यो ।

पहिलो विकेटका रुपमा तेस्रो ओभरको तेस्रो बलमा नन्दन यादवले सन्दीप सुनारलाई ३ रनमा बोल्ड आउट गरे । पाँचौ ओभरको दोस्रो बलमा प्रदीप ऐरीलाई विकेट किपर अनिल कुमार शाहले ४ रनमा रन आउटको शिकार बने । लगतै दुई बलपछि नन्दनले भिमसार्कीलाई शून्यमा पेभिलिएन फर्काए । छैटौं ओभरको चौथो बलमा बाबर हायत ३ रनमा ललित नारायण राजवंशीले गौरभ तोमरबाट क्याच गराए । लगतै यसै ओभरको अन्तिम बलमा ललितले विनोद भण्डारीलाई शून्यमा बोल्डगरेपछि रुपन्देहीको जितको संभावना सकिएको थियो । रुपन्देहीको विकेट निरन्तर गुमि रह्यो ।

भारतीय खेलाडी पुनित मेहरा ३ रनमा आउटभएपछि रुपन्देहीले ५० रन पनि नकटाउने अवस्थामा पुगेको थियो । विक्रम शोव ३,सुमित महर्जन ५ बसन्त रेग्मि २ रनमा आउट भए । नन्दन यादवले ३.१ ओभरमा ५ रन खर्चेर ३ विकेट लिए । त्यस्तै ललितसिंह राजवंशी र सुर्य तामाङले समान दुई विकेट लिदा अंकित दवास र योगेन्द्रसिंह कार्कीको नाममा समान एक एक विकेट रह्यो ।

त्यस अघि टस जितेर ब्याटिङ थालेको काठमाडौं गोल्डेन्सले निर्धारित २० ओभरमा ७ विकेटको क्षतिमा १ सय ३३ रन बनायो । काठमाडौंका लागि भारतीय खेलाडी अंकित दवासले उत्कृष्ट ब्याटिङ गरे । १८ ओभरको चौथो बलमा पुनित मेहराले बाबर हायतद्धारा क्याच गराउनु अघि अंकितले ४० बलमा ३ छक्का र १ चौका प्रहार गर्दै ४३ रनको महत्वपूर्ण पाली खेले । ओपनर अनिल कुमार शाहले २६ बलमा २ चौका र १ छक्का प्रहार गर्दै २३ रन बनाउदै काठमाडौंलाई मध्यम सुरुवात दिलाएका थिए ।

कप्तान ज्ञानेन्द्र मल्ल १२ र गौरभ तोमर ८ रनमा आउट भए । मध्यम सुरुवात गरेको काठमाडौंलाई चौथो विकेटका लागि महवुव आलम र अंकित दवासले ३३ रनको साझेदारी गर्दै इनिङ उकासे । १५ ओभरको दोस्रो बलमा अनिल खरेलले प्रदीप ऐरीबाट क्याच आउट गराउनु अघि १४ बलमा १ छक्का हान्दै ११ रन जोडे ।

त्यस्तै अन्तिम ओभरमा राशिद खानले आक्रमक रुपमा ब्याटिङ गर्दै ५ बलमा २ चौका र १ छक्का सहित १४ रनमा अट आउट रहे । योगेन्द्रसिंह कार्की १३ रनमा क्याच भए ।रुपन्देहीका युवा खेलाडी अनिल खरेलले ४ ओभरमा १ मेडन सहित १९ रन खर्चिदै २ विकेट लिए । बिक्रम शोव र पुनित मेहराले समान दुई विकेट लिदा ललित सिंह भण्डारीले एक विकेट लिए ।

यो जितसँगै काठमाडौं ४ खेलमा ७ अंक जोड्दै शिर्ष स्थानमा यथावत रहेको छ । काठमाडौं शिर्ष दुई भित्र रहेर प्ले अफ खेल्ने निश्चित भएको छ ।