भुपेन्द्र जी.सी, धनगढी

तेस्रो संस्करणको रुस्लान धनगढी प्रिमियर लिग (डिपिएल)मा भिम सार्कीले हावामा डाइभ मार्दै असद उल्लाह खानको लिएको क्याचले प्रशंसा नेपालमा मात्र नभएर विश्वभरबाट भई रहेको छ ।

डिपिएलमा हाल सम्म समुह चरणका १२ खेल सकिएका छन् । अव समुह चरणका ३ खेल हुन बाँकी छ । जसबाट अन्य ३ तीन टोलीको प्लेअफको टुङ्गो लाग्दा १ टोली बाहिरिने छ । काठमाडौं गोल्डेन्सले प्ले अफमा पुग्दा साविक विजेता धनगढी एक खेल अगाडीनै समुह चरणबाटै बाहिरिएको छ । ९ खेलको नतिजा निस्कँदा ३ खेलमा वर्षा बाधक बन्यो । हालसम्म ३ अर्धशतक बनेका छन् । १ सय ३४ सर्वाधिक रन बन्दा सबै भन्दा कम रन ३३ रहेको छ । सर्वाधिक ७६ रनको साझेदारी बनेको छ ।

ओपनर जोडीको उच्च साझेदारी ३२ रन हुँदा बलिङमा एकै पालीमा ४ विकेट व्यक्तिगत उच्च छ । फाप्लामा पहिलो पटक डिपिएलको खेल भइरहेको छ । यस अघि दुवै संस्करणको खेल संघिय प्रहरी इकाइ मैदानमा भएको थियो । स्पिनरहरुलाई राम्रो साथ मिलेको फाप्लामा बल राम्रोसँग टर्न भइरहेको छ । तीब्र गतिका बलरलाई भन्दा स्पिनरलाई राम्रो साथ मिलेको देखिन्छ । हालसम्म १ सय रनको सुरुवाती योगफल पनि सुरक्षित देखिएको छ ।

डिपिएलमा बनेको तीन अर्धशतक मध्य दुई नेपाली र एक विदेशी खेलाडीको नाममा छ । सिवाईसी अत्तरियाका कप्तान दिपेन्द्रसिंह ऐरीले जारी डिपिएलमा सर्वाधिक ६७ रन बनाएका छन् । भीम सार्कीको क्याच,दिपेन्द्रसिंह ऐरीको उत्कृष्ट अर्धशतक, सुवास ऐरको ब्याटिङले चर्चा बटुल रहँदा त्यो भन्दा बढि फाप्लाको मैदानमा रनको खडेरीलाई लिएर अनेक व्याख्या विश्लेषण चलिरहेको छ । जारी डिपिएलमा खराव सट,धैयर्ताको कमी,गैरजिम्मेवारी ब्याटिङ, हरेक बलमा ठूला सटको प्रयास, एक-दुई रन कुद्ने कमी, रन लिने क्रममा तालमेलको कमी र कमजोर मनोबललाई रन नबन्नुको मुख्य कारण मानिएको छ ।

विदेशी खेलाडी पुनित मेहरा, सन्नी पटेल, अंकित दवासले राम्रो प्रभाव जमाइरहेका छन् । गौरभ तोमर र रोहन मुस्तफाको प्रर्दशन सन्तोषजनक छैन । प्राय ब्याट्सम्यानले डट बलको अत्याधिक सामना गरेको देखिन्छ । रन भन्दा बढि बल खाई आउट हुने ब्याट्सम्यान पनि त्यतिनै छन् । फाप्लामा रन बन्दैन भनि रहेको बेला अकिंत दवासले आक्रमक रुपमा ६५ रन जोडे । विदेशी खेलाडीले मात्र रन बनाउन सक्छन् भन्ने धारणालाई गलत सावित गर्दै अत्तरियाका कप्तान दिपेन्द्रले त्यो भन्दा सानादर प्रर्दशन गरे ।

दिपेन्द्रले अर्धशतक बनाएपछि भने, ‘स्पिनरहरुको बल टर्न भइरहेको छ,मैले सटमा विकल्प लिँदै रिभर र स्विप सट प्रयोग गर्दा म रन बनाउन सफल भए ।’

त्यस्तै डिपिएलमा पहिलो पावर प्लेमै प्राय हरेक टिमको दुई-तीन विकेट गुमिरहेको छ । जसको दबाब सोझै मध्यक्रमका ब्याट्सम्यानलाई परेको छ । आईतबार काठमाडौं विरुद्ध रुपन्देहीले पहिलो ६ ओभरमा १२ रन जोड्दा ५ विकेट गुमाएको थियो । जसले गर्दा टोली ३३ रनको लज्जास्पद स्कोरमा समेटियो । कप्तान सोमपाल कामी पनि यो कुरामा सहमत छन् । सुनिल धमला, रोहन मुस्तफाजस्ता भर गरेको खेलाडी सस्तैमा आउट हुँदा टोलीलाई रन बनाउन कठिन भइरहेको सोमपाल बताउँछन् ।

हाल डिपिएलमा काठमाडौंका ओपनरको रुपमा अनिल कुमार शाह र गौरभ तोमरले ३२ रनको साझेदारी उच्च हो । जुन साझेदारीले धनगढीले प्रस्तुत गरेको १ सय ३३ रनको लक्ष्य पक्ष्याएको थियो । राम्रो लक्ष्य बनाउन र ठूलो लक्ष्य पक्ष्याउन ओपनर साझेदारी राम्रो हुनपर्छ भन्ने प्रस्ट हुन्छ । जुन विना ठूलो स्कोर बन्न सक्दैन । घरेलु मात्र होइन,राष्ट्रिय र अन्तर्राष्ट्रिय खेलमा पनि राम्रो रनको लागि ओपनरको साझेदारी आवश्यक छ ।

जारी डिपिएलमा पनि पहिलो ६ ओभर भित्रै २,३ विकेट गुमि रहेको छ । जसको कारण पनि अन्य ब्याट्समयान दवावमा परेको अनुमान गर्न सकिन्छ । हरेक ब्याट्सम्यान ठूला ठूला सट धेरै प्रहार गर्न खोजिरहेका छन् । जसको कारण धेरै क्याच र केहि बोल्ड आउट हुन पुगेका छन् ।

पछिल्लो खेलमा ९६ रनको लक्ष्य पछ्याउँदा धनगढी ९० रनमै समेटियोे । धनगढीका अधिकांश ब्याट्समयान ठूला सट खेल्दै खेल छिटो सकाउन खोज्दा जिति सकेको खेल पनि हारे । अत्तरियाले प्रस्तुत गरेको १ सय २२ रनको लक्ष्य पक्ष्याउने क्रममा रुपन्देही ८२ रनमै समेटियो । हारपछि कप्तान वसन्त रेग्मीले आफ्ना ब्याट्सम्यानको खराब सट र गैरजिम्मेवार ब्याटिङको कारण खेल हारेको बताए ।

टि-२० मा डट जति धेरै हुन्छ दवाव पनि त्यतिनै बढ्दै जान्छ । जव दवाव बढ्छ भने सहि बल पनि खराब हुन पुग्छ र विकेट गुम्छ । जव दबाब विना कुनै ब्याट्सम्यान खेल्छ भने उसलाई खराव बल पनि लाग्छ र रन पनि राम्रो बनाउ छ । हरेक बलमा चौका र छक्का मात्र होइन एक एक,दुई दुई रन तर्फपनि जोड दिनुपर्छ । जसले बलरलाई दवावमा राख्नुैको साथै टिमको रन पनि राम्रो बन्छ । दिपेन्द्रले रुपन्देहीविरुद्ध यहि रणनितिका साथ खेलेका थिए । कमजोरमा बलमा चौका छक्का प्रहार गर्दा अन्य बलमा एक दुई रन लिएका थिए । जुन प्रेरणा अन्य खेलाडीले लिन आवश्यक छ ।

डिपिएलमा सुरुवाती ओभरमा नेपाली कुनै पनि ब्याट्समयान ठूला सट खेलेको देखिदैन । कमजोर बलमा पनि अधिकांश ब्याट्सम्यन एक दुई रन नै लिएका हुन्छन् । अन्तिमा ठूला शटको प्रयास गरेको देखिन्छ । कमजोर बल छ भने सुरुवात देखिनै ठूला शटको प्रयास गर्न आवश्यक छ ।

हरेक बलरले सबै बल राम्रो गर्न सक्दैन । हरेक ओभरका सबै ६ बल राम्रो हुन सक्दैन । जुन समयसम्म ब्याट्सम्यान धैर्य गरि क्रिजमा टिक्न सक्नुपर्छ र कमजोर बलको पहिचान गरेर ठूलो सटको प्रयास गर्नुपर्छ । तर हरेक बलमा शट प्रहार गर्न खोज्दा धेरै ब्याट्समयान क्याच र केहि बोल्ड हुन पुगेका छन् ।

विहिवार महेन्द्रनगरका सागर ढकालले विराटनगरविरुद्ध मेडन सहित विकेट लिएपछि खेल हेर्न पुगेका एक समर्थकले हाँस्दै भन्दै थिए,साँच्चै यो टि–२० खेल नै हो र ? मलाइ त टेस्ट जस्तो लागेको छ ।

हुन त फाप्ला मात्र होइन काठमाडौंमा रहेको एक मात्र अन्तर्राष्ट्रिय टियु क्रिकेट मैदानमा पनि रन बन्दैन स्पिनरलाई मात्र साथ दिन्छ भन्ने धेरैनै थिए । दुइ महिना अघि पोखरा राइनोजले प्रस्तुत गरेको २ सय १६ रनको लक्ष्य भैरहवा ग्याडियट्र्सले पुरा गरेपछि प्रमाणित भएको थियो जुन मैदानमा पनि रन बन्छ । ब्याट्सम्यानले खेल्न र रन बनाउन मात्र सक्नु पर्छ ।

त्यस्तै फाप्लामा रन बन्दैन भन्ने होइन कसरी रन बन्छ भन्ने तर्फ ब्याट्सम्यान बढि सजक हुन आवश्यक छ । मैदानलाई दोष दिन भन्दा आफ्नो कमजोरी सुधारगर्दै रन बनाउन सके फाप्लामा पनि राम्रो रन बन्ने निश्चित छ ।