धनगढी (हाम्रो खेलकुद) – रुपन्देही च्यालेन्जर्स तेस्रो संस्करणको धनगढी प्रिमियर लिग (डिपिएल) को प्ले अफमा प्रवेश गरेको छ । आज भएको खेलमा घरेलु टोली धनगढी स्टार्सलाई ३९ रनले पराजित गर्दै रुपन्देही प्ले अफमा पुगेको हो ।

रुपन्देहीले प्रस्तुत गरेको १ सय ७ रनको विजयी लक्ष्य पक्ष्याउने क्रममा धनगढी १४ ओभरमा अल आउट हुँदै ६७ रनमा समेटियो । रुपन्देहीले ५ खेलमा ३ मा जित र २ मा हारका साथ प्ले अफमा स्थान बनाएको हो । रुपन्देहीकोअंक तालिकामा अन्तिम स्थान भने अत्तरियाको बाँकी दुई खेलको नतिजाले निर्धारण गर्ने छ । धनगढी भने जितविहिन हुँदै बाहिरिएको छ । धनगढी ५ खेल मध्य चारमा पराजित र १ खेलमा अंक बाड्दै बाहिरियो । धनगढीका कुनै पनि ब्याट्सम्यानले सम्झनयोग्य प्रर्दशन गर्न सकेनन् ।

घरेलु टोली घनगढीको सुरुवात नै खराब रह्यो । तेस्रो ओभरको तेस्रो बलमा विक्रम शोबले बाबर हायतबाट क्याच गराउँदै सोमपाल कामीलाई ११ रनमा पेभिलिएन फर्काए । लगतै एक वलपछि भिम सार्कीले डाइरेक्ट(सिधैं) स्टमिपङ ताक्दै सुनिल धमलालाई ४ रनमा रन आउट गरे । अर्को बलमा रोहन मुस्तफा गलत शट खेल्दै २ रमा क्याच आउट हुन पुगे ।

एकै ओभरमा प्रमुख तीन ब्याट्सम्यान गुमाएपछि धनगढी संकटमा परेको थियो । ११ औं ओभरको तेस्रो बलमा हरि बहादुर चौहान १ र चौथो बलमा पवन सरार्फ १५ रनमा आउट भएपछि धनगढीको हार निश्चित बनेको थियो । सन्दीप रजाली १०, विकेटकिपर राजु रिजाल ५ र आमिर हायत ८ रनमा आउट भए ।

रुपन्देहीको सहज जितमा ललितसिंह भण्डारीले घातक बलिङ गर्दै ३ ओभरमा मात्र ५ रन खर्चेर ३ विकेट लिए । त्यस्तै बिक्रम शोवले २ तथा पुनित मेहेरा, भीम सार्की र वसन्त रेग्मीले समान एक-एक विकेट हात पारे ।

त्यसअघि टस जितेर पहिला ब्याटिङ थालेको रुपन्देहीले निर्धारित १५ ओभरमा ९ विकेट गुमाउँदै १ सय ६ रन बनायो । हुस्सु लागेको कारणका निर्धारित समय भन्दा झन्डै डेढ घण्टापछि सुरु हुँदा खेल १५ ओभरमा झारिएको थियो । रुपन्देहीका लागि युवा ब्याट्सम्यान सुमित महर्जनले २४ बलमा समान २ चौका र छक्का प्रहार गर्दै ३३ रनको महत्वपूर्ण योगदान दिए । त्यस्तै विनोद भण्डारीले २५ बलमा २ चौकाको सहयोगमा २४ रन जोडे ।

सोमपाल कामीले पहिलो ओभरको दोस्रो बलमा प्रदीप ऐरीलाई आमिर हायतबाट क्याच गराउँदै शून्यमा आउट गरे । त्यस्तै तेस्रो ओभरको पहिलो बलमा चौका, दोस्रो र तेस्रो बलमा छक्का हानेका बाबर हायतलाई सोमपालले चौथो बलमा भने आमिर हायतबाट क्याच गराउँदै १९ रनमा पेभिलिएन फर्काए । बाबरले १० बलमा १ चौका र २ छक्का प्रहार गरे ।

बाबर आउट भएसँगै रुपन्देहीलाई प्रतिस्पर्धात्मक लक्ष्य सम्म पुर्याउन विनोद भण्डारी र सुमित महर्जनले ५७ रनको महत्वपूर्ण साझेदारी गर्दै इनिङ उकासे । सुमितलाई १० औं ओभरको पाँचौ बलमा रोहन मुस्तफाले सन्दीप रजालीबाट क्याच गराउँदै साझेदारी तोडेका थिए । लगत्तै विनोद भण्डारीलाई ११ औं ओभरको अन्तिम बलमा विपिन खत्रीले पवन सरार्फबाट क्याच आउट गराए । भिम सार्की २, पुनित मेहेरा ६ र बिक्रम शोव ११ रनमा आउट भए ।

धनगढीका सोमपाल कामी,बिपिन खत्री र पवन सरार्फले समान २-२ लिए । रोहन मुस्तफा र आमिर हायत नाममा समान १ विकेट रह्यो ।