धनगढी (हाम्रो खेलकुद)– डिपिएल इमर्जिङ स्टार यू-१९ टोलीले अर्को वर्ष दक्षिण अफ्रिकाको भ्रमण गर्ने भएको छ । रुस्लान धनगढी प्रिमियर लिग (डिपिएल) ३ को प्रदर्शनका आधारमा १४ युवा खेलाडी छनोट गरिने बताइएको छ ।
डिपिएल आयोजक धनगढी क्रिकेट एकेडेमी र स्पोर्टस् एडको संयुक्त पहलमा इमर्जिङ स्टार टोलीलाई दुई साताको लागि दक्षिण अफ्रिका भ्रमणमा लगिन लागिएको हो । डिपिएलको समाप्तीपछि १४ सदस्यीय खेलाडीको घोषणा गरिने बताइएको छ । डिपिएल शनिबार सकिनेछ ।
डिपिएलका सद्भावना दुत दक्षिण अफ्रिकाका पूर्व क्रिकेट खेलाडी जोन्टी रोड्सले नेपाली युवा खेलाडीका लागि भ्रमण महत्वपूर्ण हुने बताएका छन् । डिपिएल इमर्जिङ स्टारले दक्षिण अफ्रिका प्रान्तिय र स्थायिन उमेर समूहका खेलाडीको टोलीसँग प्रतिस्पर्धा गर्नेछन् ।
डिसिएका अध्यक्ष सुवास शाहीले डिपिएल खाली दुई साताको प्रतियोगितामा मात्र सिमित नहुने र दीर्घकालिन योजनाका साथ काम गरिने बताए । स्पोर्टस एडका अभिषेक केसीले भ्रमणका लागि ४० लाख रुपैयाँ भन्दा बढी खर्च हुने अनुमान गरिएको बताएका छन् । छनोट हुने खेलाडीलाई पनि आर्थिक भार नपारिने केसीले प्रष्ट पारेका छन् ।
