धनगढी (हाम्रो खेलकुद) – तेस्रो संस्करणको धनगढी प्रिमियर लिग (डिपिएल) प्रस्तावित अन्तर्राष्ट्रिय फाप्ला क्रिकेट मैदानमा जारी छ । प्रतियोगिताको समुह चरणको खेल सकिँदा काठमाडौं गोल्डेन्स र सीवाईसी अत्तरिया पहिलो क्वालिफायर खेल्ने भएका छन् । त्यस्तै महेन्द्रनगर युनाइटेड र रुपन्देही च्यालेन्जर्सबीच एलिमिनेटर खेल हुने छ । एलिमिनेटरको विजेता र क्वालिफायमा हारेको टोलीबीच पुन: प्रतिस्पर्धा हुनेछ । विजेता टोली पहिलो क्वालिफायरको विजेतासँग उपधिको लागि फागुन ११ मा खेल्ने छ ।

जारी प्रतियोगितामा टोलीको सर्वाधिक स्कोर १ सय ४८ हुँदा सबैभन्दा कम ३३ रह्यो । फराकिलो जितमा १ सय रनको हुँदा झिनो अन्तर २ रन रह्यो । जारी डिपिएलमा ब्याटिङमा भारतीय खेलाडीको प्रर्दशन उत्कृष्ट हुँदा नेपालका केहि युवा खेलाडीको प्रर्दशन मात्र सन्तोषजनक रहेको छ । अन्य कुनैपनि खेलाडीले सम्झन लायक प्रर्दशन गरेका छैनन् । नेपाली क्रिकेट पछिल्लो समय युवा खेलाडीमा हस्तान्तरण भई रहेको छ । जुन कुरा जारी डिपिएलको प्रर्दशनले पनि पुष्टि गर्दछ । सिनियर टिमबाट खेली सकेका खेलाडीको तुलनामा युवा खेलाडीको प्रर्दशन राम्रो छ ।

सधैं कमजोर मानिने ब्याटिङ डिपिएलमा पनि सुधार भएको अनुभव गर्न सकिएन । नेपालको घरेलु लिगमा मात्र होइन,राष्ट्रिय तथा अन्तर्राष्ट्रिय स्तरमा पनि प्राय ब्याटिङ कमजोर हुने गर्दछ । कमजोर ब्याटिङकै कारण नेपालले अन्तर्राष्ट्रिय स्तरमा थुप्रै ठूला अवसर गुमाएको छ । नेपालको ब्याटिङ कति सम्म कमजोर छ भन्ने जारी डिपिएलको प्रर्दशनबाटै प्रष्ट हुँन्छ । डिपिएलमा सर्वाधिक रन बनाउने शिर्ष ५ खेलाडी मध्य ३ विदेशी र २ नेपाली खेलाडी छन् ।

यी हुन् डिपिएलमा सर्वाधिक रन बनाउने ५ खेलाडी

अंकित दवास – २६ वर्षिय अंकित दवास झारखण्डबाट रणजी ट्रफी खेली सकेका भारतीय अलराउण्डर हुन् । जारी डिपिएलमा काठमाडौंबाट खेलेका अंकितले ४ खेलमा १ सय ४७ रन बनाउँदै सर्वाधिक रन बनाउने खेलाडीको सुचिमा शीर्षस्थानमा छन् । ४ खेलमा अंकितले ४९.०० को औसतमा समान ८ छक्का र चौका प्रहार गरेका छन् । स्ट्राइक रेट १०६.५२ रहेको छ ।

पहिलो खेलमा धनगढी स्टार्सविरुद्ध २९ रन प्रहार गरेका अंकितले दोस्रो खेलमा महेन्द्रनगरविरुद्ध दमदार ६५ रनको अविजित पाली खेले । त्यस्तै रुपन्देही च्यालेन्जर्सविरुद्ध ४३ रन प्रहार गरे । त्यस्तै समुह चरणको अन्तिम खेलमा सीवाईसी अत्तरियाविरुद्ध भने १० रनमा आउट भए ।

सन्नी पटेल – पछिल्लो समय नेपाली फ्रेन्चाइज लिगमा उत्कृष्ट प्रर्दशन गर्दै आएका भारतीय खेलाडी सन्नी पटेल जारी डिपिएलमा पनि उत्कृष्ट प्रर्दशन गरेका छन् । डिपिएलमा सर्वाधिक रन बनाउने खेलाडीको सुचिमा दोस्रो स्थानमा छन् ।

सिवाईसीको जर्सि लगाएका पटेलले १४९.४१ को स्ट्राइक रेटमा ६३.५० औसतमा कुल १ सय २७ रन जोडे । जसमा समान ८ छक्का र चौका सामेल छ । पटेलले रुपन्देहीविरुद्ध १२,धनगढीसँगको खेलमा ३५ रन जोडे । महेन्द्रनगरविरुद्ध १९ रन हानेका पटेलले विराटनगरसँगको खेलमा ३१ बलमा ६१ रन प्रहार गरे ।

दिपेन्द्रसिंह ऐरी – नेपाली राष्ट्रिय टिमका मिडिल अडरका भरपर्दा ब्याट्सम्यान जारी डिपिएलमा सर्वाधिक रन बनाउने तेस्रो खेलाडी हुन् । डिपिएल मात्र होइन पछिल्ला इपीएल र पिपिएलमा पनि दिपेन्द्र सर्वाधिक रन बनाउने खेलाडीको सुचिमा शीर्ष ५ भित्र अट्ने एक्लो नेपाली ब्याट्सम्यान बन्दै आएका छन् ।

अत्तरियालाई क्यालिफायर सम्म पुर्याउन दिपेन्द्रले ब्याटिङसँगै कप्तानी पनि उत्कृष्ट छ । कुल ५ खेलमा १ सय १८ रन जोडेका छन् । स्ट्राईक १२८.२६ रहँदा २९.५० औसत रन छ । कुल १५ चौका र १ छक्का सामेल छ । दिपेन्द्रले विराटनगर र महेन्द्रनगरसँगको खेलमा समान १० रन जोडे । त्यस्तै धनगढीविरुद्ध ११ रन मात्र बनाउन सक्दा रुपन्देहीविरुद्ध ६७ रनको दमदार पाली खेले । अन्तिम खेलमा काठमाडौंविरुद्ध २० रनमा अविजित रहे ।

जय किशन कोल्सावाला – अत्तरियाका विकेटकीपर तथा भारती खेलाडी कोल्सावाला जारी डिपिएलमा सर्वाधिक रन बनाउने चौथो खेलाडी हुन् । कोल्सावालाले कुल ५ खेलमा ८९.२३ स्ट्राइक ब्याटिङ घुमाउँदै २९.०० कोे औसतमा कुल १ सय १६ रन जोडेका छन् ।

विराटनगरसँगको खेलमा ५१ रन बनाए । धनगढीसँगको खेलमा २१ र रुपन्देहीविरुद्ध १ रन जोडे । त्यस्तै महेन्द्रनगरसँगको खेलमा १० र अत्तरियाविरुद्ध ३३ रन जोडे । कोल्सावालाले कुल ११ चौका र ४ छक्का प्रहार गरेका छन् ।

सुमित महर्जन – रुपन्देहीका स्टार खेलाडी प्रदीप ऐरी, विनोद भण्डारी, भिम सार्की, बाबर हायत फ्लप हुँदा युवा ब्याट्सम्यान सुमित महर्जनले औसत प्रर्दशन गर्दै सर्वाधिक रन बनाउने खेलाडीको सुचिमा पाँचौ स्थानमा रहे ।

रुपन्देहीलाई प्ले अफ सम्म पुयाउन महत्वपूर्ण प्रर्दशन गरेका महर्जनले ४ खेलमा कुल ८७ रन जोडेका छन् । स्ट्राइक रेट ९०.६२ रहँदा २९.०० औसत रन छ । कुल ५ छक्का र ४ चौका प्रहार गरेका छन् । धनगढीविरुद्ध ३३, महेन्द्रनगरसँगको खेलमा २७ र अत्तरियाविरुद्ध २२ रन जोडे । काठमाडौंसँगको खेलमा भने ५ रनमा आउट भए ।