एजेन्सी – मिडिल अडरका भरपर्दा तथा अनुभवी ब्याट्सम्यान रोश टेलरको कीर्तिमानी अर्धशतक र टिम साउथीको उत्कृष्ट बलिङसँगै बगलादेशसँगको तीन ओडीआई सिरीजमा घरेलु टोली न्युजिल्यान्डले क्लिन स्विप गरेको छ ।
आज भएको अन्तिम ओडीआईमा बंगलादेशलाई ८८ रनले पराजित गर्दै न्युजिल्यान्डले श्रृंखला ३-० ले जितेको हो । टस हारेर पहिला ब्याटिङ थालेको न्युजिल्यान्डले ५० ओभरमा ६ विकेटको क्षतिमा ३ सय ३० रन बनाएको थियो ।
न्युजिल्यान्डका लागि रोश टेलरले ८२ बलमा ७ चौका प्रहार गर्दै ६९ रन बनाए । यो सँगै टेलर न्युजिल्यान्डबाट ८ हजार रन बनाउने दोस्रो खेलाडी बने । त्यस्तै न्युजिल्यान्डबाट वान डे क्रिकेटमा सर्वाधिक रन बनाउने खेलाडी पनि बनेका छन् । टेलरले वान डे खेलमा कुल ८ हजार २६ रन बनाएका छन् ।
न्युजिल्यान्डबाट ओडीआईमा सर्वाधिक रन बनाउने खेलाडी स्टीफन फ्लेमिङ्गले ८ हजार ७ रन बनाएका छन् । त्यस्तै बंगलादेशलाई विशला लक्ष्य प्रस्तुत गर्न हिनरी निकोलस ६४,टम लाथम ५९,जेम्स निसम र कोलीन डी ग्रान्ड होमले समान ३७ रन बनाए । ओपनर आर्टिन गप्टिल २९,कोलिन मुनरो ८ रनमा आउट हुँदा मिचेल सेन्टनर १६ रनमा अविजित रहे ।
बंगलादेशका मुस्तफिजुर रहमान २,मशरफे मुोर्तजा,रुवेल हसन,महेदी हसन र मोहम्मद सैफुद्दीनले समान एक एक विकेट लिए । ३ सय ३१ रनको लक्ष्य पक्ष्याउने क्रममा बंगलादेश ४७.२ ओभरमा २ सय ४२ रनमा समेटियो ।
बंगलादेशका लागि सब्बीर रहमानले शतक प्रहार गरेपनि टोलीको हार टार्न सकेनन् । रहमानले १ सय १० बलमा १२ चौका र २ छक्का सहित १ सय २ रन बनाउँदै हारको अन्तर घटाए। मोहम्मद सैफुद्दीन ६३ बलमा ४ चौका प्रहार गर्दै ४४ रन जोडे ।
मुश्फिकुर रहिम १७,मोहमूदुल्लाह १६ रनमा आउट हुँदा तामिम इकवाल र लिटन दास डक आउट हुन पुगे । त्यस्तै मेहेदी हसनले ३७ र रुवेल हसन ३ रनमा आउट भए । कुनै समय १४.४ ओभरमा ६१/५ को अवस्थामा पुगेको बंगलादेशलाई शब्बिर रहमानले शतक बनाउदै उद्दार गरेका थिए ।
न्युजिल्यान्डका लागि टिम साउथीले ९.२ ओभरमा १ मेडन सहित ६५ रन खर्चेर ६ विकेट लिए । त्यस्तै ट्रेन्ट बोल्टल २ र कोलिन डी ग्रान्ड होमको नाममा १ विकेट रह्यो । यस अघि पहिलो र दोस्रो खेलमा न्युजिल्यान्ड समान ८ विकेटले विजयी भएको थियो ।
