काठमाडौं (हाम्रो खेलकुद) – तेस्रो संस्करणको रुस्लान धनगढी प्रिमियर लिग (डीपीएल) मा सहभागी १९ बर्ष मुनिका खेलाडीहरु सम्मिलित डिपिएल इमर्जिङ स्टार घोषणा भएको छ । आयोजक धनगढी क्रिकेट एकेडेमीले दक्षिण अफ्रिका भ्रमणमा जाने १५ जना १९ बर्ष मुनिका खेलाडीहरुको नाम घोषणा गरेको हो ।

डीपीएलले स्पोर्ट्स एडसँगको सहकार्य तथा जोन्टी रोड्स र रायन मरोनको पहलमा डीपीएल इमर्जिङ स्टार्सलाई दक्षिण अफ्रिकाको दुई साताको भ्रमण गराउने भएपछि सम्भावना बोकेका खेलाडीहरु छनोट गरिएका हुन् । डिपिएल इमर्जिङ स्टारको टोलीमा रोहितकुमार पौडेल, रित गौतम, भीम सार्की, कुशल मल्ल, तृतराज दास, सुवास ऐर, सुशील खड्का र कमलसिंह ऐरी छन् । यस्तै रशिद खान, आदील अन्सारी, दिपेन्द्र रावत, कृष्ण ऐर, पवन सर्राफ, सन्दिप जोरा र खगेन्द्र जैसीले पनि अन्तिम १५ मा स्थान बनाउन सफल भए ।

डिपिएल इमर्जिङ स्टारको टोली आगामी दशैंपछि दक्षिण अफ्रिकाको भ्रमणमा जानेछ । भ्रमणमा कुल ४० लाख खर्च लाग्ने अनुमान गरिएको छ । १५ सदस्यीय टोलीको सम्पूर्ण खर्च आयोजक डिपिएल र स्पोर्ट्स एडले व्यवस्थापन गर्ने एकेडमीका अध्यक्ष सुवाश शाहीले जानकारी दिए ।

डीपीएल इमर्जिङ स्टार्सले केप टाउनमा स्थानीय क्लब र प्रान्तीय टोलीसँग ५० ओभर र २ दिवसीय क्रिकेट खेल्नेछ । खेलाडीको प्रदर्शन र उमेर हेरेर टोलीको छनोट गरिएको स्पोर्ट्स एडका अभिषेक केसीले बताए । जोन्टी रोड्स र रायन मरोनसँग दक्षिण अफ्रिाकामा हाई पर्फरमेन्स क्याम्प पनि सञ्चालन हुने आयोजकले जनाएको छ ।