काठमाडौं (हाम्रो खेलकुद) – क्रिकेट खेलाडी संघ (सिप्यान) नेपालले आयोजना गर्न लागेको एनसिसिएस–सिप्यान क्रिकेट अवार्डको ५ विधामध्ये तीन विधाको मनोनयन सार्वजनिक भएको छ ।

सिप्यानले आइतबार राजधानीमा पत्रकार सम्मेलनको आयोजना गरेर अवार्डको तीन विधा वर्ष क्रिकेट खेलाडी पुरुष, वर्ष क्रिकेट खेलाडी महिला र वर्ष उदियमान खेलाडीको मनोनयन सार्वजनिक गरेको हो । नेपाली राष्ट्रिय क्रिकेट टिमका पुर्व कप्तान, यु–१९ टिमका मुख्य प्रशिक्षक तथा महिला राष्ट्रिय टिमका मुख्य प्रशिक्षक विनोद दासले मनोनयन सार्वजनिक गरे ।

यसअघि सिप्यानले भोटिङका लागि मोमेन्ट अफ दि इयरको १० उत्कृष्ट क्षणलाई सार्वजनिक गरिसकेको थियो । मोमेन्ट अफ दि इयरको अवार्डको लागि भोटिङ जारी रहेको र सोमबार राति १२ बजेसम्म भोटिङ खुल्ला रहने आयोजकले जनाएको छ । लाइफ टाइम एचिभमेन्ट अवार्डबाट एक जना सोही दिन नै सम्मानित हुनेछन् ।

वर्ष क्रिकेट खेलाडी पुरुषमा कप्तान पारस खड्कासँगै युवा लेग स्पिनर सन्दीप लामिछाने मनोनयनमा परेका छन् । यस्तै दीपेन्द्रसिंह ऐरी, करण केसी र सोमपाल कामी पनि मनोनयनमा परेका छन् । मनोनयनमा परेका खेलाडीहरु अघिल्लो वर्षदेखि युएईविरुद्धको सिरिजमा गरेको प्रदर्शनका आधारमा खेलाडी छनोट गरेको सिप्यानले जनाएको छ ।

यस्तै वर्ष क्रिकेट खेलाडी महिलामा कप्तान रुविना क्षेत्री वेलवासीसँगै करुणा भन्डारी, इन्दु बर्मा, सीता रानामगर र सरिता मगरबीच प्रतिस्पर्धा हुनेछ । उनीहरलाई एक महिना अघि थाइल्यान्डमा भएको महिला टी–२० स्म्यासमा गरेको प्रदर्शनका आधारमा छनोट गरिएको आयोजकले जनाएको छ । यस्तै उदियमान वर्ष खेलाडीमा अभिनास बोहोरा, ललितनारायण राजवंशी, रोहित कुमार पौडेल र सन्दीप जोरासँगै महिलाबाट कविता कुँवर मनोनयनमा परेका छन् ।

तीन विधाको अवार्डको लागि ७ सदस्यीय प्राविधिक समिति गठन गरि उनीहरुले योग्य खेलाडी छनोट गरेको सिप्यानले जनाएको छ । प्राविधिक समितिमा राष्ट्रिय टिमका मुख्य प्रशिक्षक जगत टमाटा, महला टिमका प्रशिक्षक विनोद दास, अम्पायर विनय कुमार झा, अम्पायर दुर्गानाथ सुवेदी (देवेन्द्र), पत्रकार सरिता श्रेष्ठ, सुबास हुमागाई र प्राविधिक को–अर्डिनेटरमा नेपाली क्रिकेट टिमका व्यवस्थापक तथा टेक्निकल एनलिस्ट रमन शिवाकोटी रहेका छन् । समितिका सदस्य तथा प्रशिक्षक विनोद दासले नेपालीहरुको प्रदर्शन, टिममा पारेको प्रभावलाई आधार मानेर मनोनयनका लागि खेलाडी छनोट गरिएको बताए ।

मनोनयनमा परेका मध्येबाट हरेक विधामा एक जना मंगलबार आयोजना हुने अवार्डबाट विजेता छानिनेछ । वर्ष पुरुष खेलाडीको विजेताले करसहित १ लाख ३२ हजार रूपैयाँ पाउनेछन् । वर्ष महिला खेलाडीको विजेता र उदियमान खेलाडीले समान ६६ हजार रूपैयाँ हात पार्नेछन् । यसैबीच आयोजको अवार्डको सम्पुर्ण तयारी अन्तिम चरणमा पुगेको जनाएको छ । अवार्ड कार्यक्रम रसियन कल्चर सेन्टरमा हुनेछ ।