काठमाडौं -(हाम्रो खेलकुद) – आठौं राष्ट्रिय खेलकुद प्रतियोगिता अन्तर्गत क्रिकेटको प्रदेश ३ छनोटमा काठमाडौं जिल्लाले नुवाकोटमाथि ९ विकेटको फराकिलो जित हात पारेको छ ।

शुक्रबार विहान टियू क्रिकेट मैदानमा सम्पन्न खेलमा १ सय ४ रनको लक्ष्य काठमाडौंले मात्र ११.१ ओभरमा १ विकेटको क्षतिमा १ सय ५ रन बनायो । काठमाडौंको जितमा भुपेन्द्र थापाले ३६ बलमा ४ चौका र ३ छक्का प्रहार गर्दै ४४ रनमा नट आउट रहे । प्रकाश विष्टले ३४ बलमा ६ चौका र १ छक्का प्रहार गर्दै ४१ रनमा अविजित रहँदा रविन जोजी ५ रनमा पेभिलिएन फर्के । नुवाकोटका लागि दिपेन्द्र प्याकुरेले १ विकेट लिए ।

त्यसअघि टस जितेर पहिला ब्याटिङ थालेको नुवाकोटले निर्धारित २० ओभरमा ४ विकेट गुमाउँदै १ सय ३ रन बनाएको थियो । उसका लागि राजेश रिमालले ४९ बलमा ४ चौका १ छक्का प्रहार गर्दै ५२ रनको अविजित पारी खेले पनि हार टर्न सकेन । अभियान बस्नेतले १५ रन जोड्न बाहेक नुवाकोटका अन्य कुनै पनि ब्याट्सम्यानले राम्रो प्रर्दशन गर्न सकेनन् । काठमाडौंको जितमा जितेन्द्रसिंह ठकुरीले २,शरद खड्का र प्रतिस जिसीले समान एक-एक विकेट हात पारे ।

काठमाडौंका प्रमुख खेलाडी ज्ञानेन्द्र मल्लले तेस्रो संस्करणको धनगढी प्रिमियर लिगको दोस्रो क्वालिफायर खेलमा महेन्द्रनगर युनाइटेडसँगको खेल बहिस्कार गरेको भन्दै टेक्नीकल कमिटिले ४ खेलमा विहिवार प्रतिबन्ध लगाएको थियो । मल्लको प्रतिबन्धसँगै काठमाडौंको प्रर्दशनमा असर पर्ने अनुमान गरिएको थियो । तर पहिलो खेलमा सानदार जित हात पारेको छ । काठमाडौंले दोस्रो खेल शनिबार चितवनसँग र आइतबार भक्तपुरसँग खेल्ने छ ।

काठमाडौंका प्रशिक्षक सुनोज भट्टराईले मल्ल टिममा नहुँदा आगमी दिनमा असर पर्नसक्ने बताए । ‘पक्कैपनि मल्ल जस्ता राष्ट्रिय टिमका भरपर्दा खेलाडी टिममा नहुँदा हामीलाई घाटा हुन्छ । आज हाम्रो प्रतिद्वन्द्वी तुलनात्मक रुपमा कमजोर देखिए । अरु टिम कस्ता छन,राम्रोसँग थाहा छैन,मल्ललाई भने मिस गर्ने छौं,’ प्रशिक्षक भट्टराईले भने । त्यस्तै भट्टराईले राष्ट्रिय टिमबाट खेली सकेका खेलाडी स्वत: छनोट हुने पनि जानकारी दिए ।

प्रदेश ३ छनोटमा समुह ‘ए’ मा काठमाडौं,चितवन,नुवाकोट र भक्तपुर रहँदा समुह ‘बी’ मा मकवानपुर,काभ्रेपाञ्चोक र ललितपुर छन् । समुह ‘ए’ र ‘बी’ बाट शिर्ष दुई दुई टोली सेमिफाइनल प्रवेश गर्ने छन् । सेमिफाइनल खेल फागुन २७ गते हुने छ । यदी काठमाडौं फाइनल सम्म पुगेको खण्डमा ज्ञानेन्द्रले छनोट खेल खेल्न पाउने छन् । फाइनल खेल फागुन २८ गते हुने छ ।

काठमाडौंको टोली : रविन जोशी, जितेन्द्रसिंह ठकुरी, ईशान पाण्डे, भुपेन्द्र थापा, प्रकाश विष्ट, प्रतिस जि.सी, सोनु देवकोटा, शरद खड्का, अभिनास अधिकारी, सचिन शर्मा, अमृत थापा, ज्ञानेन्द्र मल्ल, दिपक बोहोरा, पियुस केसी ।