एजेन्सी – अलराउन्डर हार्दिक पान्ड्याले तल्लोक्रममा आक्रमक ब्याटिङ गरेपछि इन्डियन प्रिमियर लिग(आईपीएल) को सातौं खेलमा मुम्बई इन्डियन्सले रोयल च्यालेन्जर्स बेंगलोरलाई १ सय ८८ रनको मध्यम लक्ष्य दिएको छ ।
बेंगलोरको घरेलु मैदानमा एम चिन्नास्वामी क्रिकेट स्टेडियमा टस हारेर पहिला ब्याटिङ थालेको मुम्बईले निर्धारित २० ओभरमा ८ विकेटको क्षतिमा १ सय ८७ रन बनायो । मुम्बईका लागि कप्तान रोहित शर्माले ३३ बलमा ८ चौका र १ छक्का प्रहार गर्दै ४८ रन जोडे । सूर्यकुमार यादव ३८, क्विन्टन डी कक र युवराज सिंहले समान २३ रन बनाए । हार्दिक पान्ड्याले अन्त्यतिर १४ बलमा २ चौका र ३ छक्का प्रहार गर्दै ३२ रनमा अविजित रहँदै बलियो योगफल तयार पारे ।
ओपनर रोहित शर्मा र क्विन्टन डी ककले पहिलो विकेटका लागि ६.३ ओभरमा ५४ रनको साझेदारी गर्दै मुम्बईलाई राम्रो सुरुवात दिलाएका थिए । डी ककलाई युजवेन्द्र चाहालले बोल्ड गर्दै ओपनर साझेदारी तोडे । ११ औं ओभरको चौथो बलमा रोहित शर्मालाई उमेश यादवले मोहम्मद सिराजबाट क्याच आउट गराउदै पेभिलिएन फर्काए । युवराजले १४ औं ओभरको पहिलो,दोस्रो र तेस्रो बलमा चाहाललाई लगातार छक्का प्रहार गर्दा चौथो बलमा ठूलो शट खेल्ने क्रममा बाउन्ड्री नजिकै मोहम्मद सिराजले क्याच गरेसँगै मुम्बईको विकेट निरन्तर गुम्दा ठूलो स्कोर बनाउन चुकेको हो ।
मुम्बईका अन्य क्रुनाल पान्ड्या १, काइरान पोलार्ड ५ र मिचेल म्याकक्लेघान १ रनमा आउट भए । बेंगलोरका लागि स्पिनर युजवेन्द्र चाहलले ४ ओभरमा ३८ रन खर्चेर ४ विकेट लिए । त्यस्तै उमेश यादव र मोहम्मद सिराजको नाममा समान दुई विकेट रह्यो । दुबै टोली पहिलो जितको खोजमा छन् । यस अघि पहिलो खेलमा मुम्बई दिल्लीसँग ३७ रनले पराजित हुँदा बंगलोर चेन्नईसँग ३७ रनले पराजित भएको थियो ।
