एजेन्सी – इन्डियन प्रिमियर लिग (आईपीएल)को २३ औं खेलमा आज उपाधिका दावेदारका रुपमा हेरिएका कोलकता नाइट राइडर्स र चेन्नई सुपर किंग्सबीच प्रतिस्पर्धा हुँदैछ ।
नेपाली समयअनुसार बेलुका ८ : १५ देखि हुने खेल चेन्नईको घरेलु मैदान एमए चिदम्बरम स्टेडियमा हुनेछ । चेन्नई महेन्द्र सिंह धोनी र कोलकता दिनेश कार्तिकको कप्तानीमा मैदान उत्रनेछन् । यी दुवै टोली पाँचौ जितको खोजिमा छन् । चेन्नई घरेलु मैदानको फाइदा उठाउन चाहान्छ ।
दुवैले जारी आईपीएलमा उत्कृष्ट प्रर्दशन गरिरहेका छन् । आन्द्रे रसेलले विष्फोटक ब्याटिङ गर्दै कोलकातालाई कठिन अवस्थामा पनि सहज जित दिलाउँदा उपाधिको दावेदारको रुपमा आफूलाई प्रस्तुत गरेको छ । रसेललाई रोक्न घरेलु मैदानमा चेन्नईका बलरलाई निकै चुनौतिपूर्ण हुने देखिन्छ । त्यस्तै क्रिस लिन, सुनिल नारायण, नितिश राना, कप्तान दिनेश कार्तिक पनि राम्रो लयमा छन् । बलिङतर्फ स्पिनर कुलदिप यादव, प्रसिद्ध कृष्णा, पियुष चवाला, ह्यारी गर्नीको प्रर्दशन पनि उत्कृष्ट छ ।
यता अनुभवी खेलाडीले भरिएको चेन्नईमा कप्तान धोनीसँगै केदार जाधव,फाफ डु प्लेसिस र शेन वाटशन लयमा छन् । कप्तान धोनीले आफैं पनि उत्कृष्ट फिनिसिङ गर्दै आएका छन् । त्यस्तै रविन्द्र जडेजा, हरभजन सिंह, इमरान ताहिर र दिपक चाहारले निरन्तर विकेट लिइरहेका छन् ।
आईपीएलमा यी दुई टोलीबीच हालसम्म २१ खेल भएको छ । जसमा चेन्नई १२ खेलमा विजयी हुँदा ८ खेलमा पराजित र १ खेल नतिजाविहिन छ । यी दुईबीच अंक तालिकामा पनि कडा प्रतिस्पर्धा छ । कोलकता र चेन्नईले समान ५ खेल खेलेका छन् । जसमा समान ४ मा जित र १ मा हारका साथ ८ अंक जोड्दै कोलकता नेट रनरेटका आधारमा शीर्षस्थानमा रहँदा चेन्नई दोस्रो स्थानमा छ । आजको खेलमा चेन्नई विजयी भएको खण्डमा शीर्षस्थानमा समेत उक्लिने छ ।
