एजेन्सी – चेन्नई सुपर किंग्स इन्डियन प्रिमियर लिग (आईपीएल) को अंक तालिकामा शीर्ष स्थानमा उक्लिएको छ ।

मंगलबार राती सम्पन्न २३ औं खेलमा कोलकता नाइट राइडर्सलाई ७ विकेटले पराजित गर्दै चेन्नई शीर्ष स्थानमा उक्लिएको हो । १ सय ९ रनको सामान्य लक्ष्य पछ्पाएको चेन्नईले १७.२ ओभरमा ३ विकेटको क्षतिमा पुरा गर्यो । चेन्नईको जितमा फाफ डु प्लेसिसले ४५ बलमा ३ चौका सहित ४३ र केदार जाधव ८ रनमा अविजित रहे ।

दोस्रो ओभरको दोस्रो बलमा सुनिल नारायणको बलमा पियुष चवलाले क्याच गर्नु अघि ओपनर शेन वाटशनले ९ बलमा २ चौका र १ छक्का प्रहार गर्दै १७ रनको योगदान दिए । नारायणलेनै पाँचौ ओभरको अन्तिम बलमा चवलाको हातबाट क्याच गराउँदै सुरेश रैनालाई १४ रनमा पेभिलिएन फर्काए । आम्बाती रायडू २१ रनमा आउट भए ।कोलकताका लागि सुनिल नारायणले २ र पियुष चवलाले १ विकेट लिन बाहेक अन्य कुनैपनि बलरले विकेट लिन सकेनन् ।

त्यस अघि चेन्नईको घरेलु मैदान एमए चिदम्बरम स्टेडियममा टस हारेर ब्याटिङ थालेको कोलकताले निर्धारित २० ओभरमा ९ विकेटको क्षतिमा १ सय ८ रन बनायो । कोलकताका लागि आन्द्रे रसेलले ४४ बलमा ५ चौका र ३ छक्का प्रहार गर्दै ५० रनमा अविजित रहे पनि एक्लो प्रयास जितको लागि प्राप्त भएन । अन्य कुनै पनि ब्याट्सम्यानले सम्झन योग्य प्रर्दशन गर्न सकेनन् । रसेलले अन्तिम ओभरमा स्कर्ट कुग्गेलेजइनलाई २ चौका र १ छक्का प्रहार गर्दै कुल १५ रन बटुले ।

कुनै समय ४७–६ को कमजोर अवस्थामा पुगेको कोलकतालाई आन्द्रे रसेल र पियुष चवलाले २९ रनको साझेदारी गर्दै उद्धार गर्न खोजेका थिए । तर १६ ओभरको तेस्रो बलमा चवलालाई हरभजन सिंहले महेन्द्रसिंह धोनीबाट ८ रनमा स्टम्पिङ आउट गरेपछि कोलकता सस्तैमा समेटिएको हो । रसेलले एक तर्फबाट रन जोड्दा अर्को तर्फबाट निरन्तर विकेट गुमि रह्यो ।

कोलकताले सुरुवात देखिनै खराव प्रर्दशन गर्यो । पहिलो ओभरको अन्तिम बलमा दिपक चाहरले क्रिस लिनलाई शून्यमा एलवी डब्लू आउट गरे । लगत्तै दोस्रो ओभरको पाँचौ बलमा हरभजन सिंहले सुनिल नारायणलाई ६ रनमा चाहरबाट क्याच आउट गराए । तेस्रो ओभरको तेस्रो बलमा चाहरले आम्बाती रायडूबाट क्याच गराउँदै नितेश रानालाई शून्यमा पेभिलिएन फर्काए । पाँचौ ओभरको चौथो बलमा चाहरले रबिन उथाप्पालाई केदार जाधवबाट ११ रनमा आउट गरेपछि कोलकता २४–४ को कमजोर अवस्थामा पुग्यो ।

इमरान ताहिरले नवौं ओभरको चौथो बलमा कप्तान दिनेश कार्तिकलाई १९ रन र ११ ओभरको पहिलो बलमा सुभमन गिलाई ९ रनमा आउट गरेपछि ४७–६ को कमजोर अवस्थामा पुग्दै एक सय रन बनाउन पनि मुश्किल पर्ने कमजोर अवस्थामा पुगेको थियो । कोलकताको निरन्तर विकेट गुम्ने शिलशिला जारी रह्यो । कुनै पनि ब्याट्सम्यानले मैदानमा टिकेर रन बनाउन सकेनन् ।

कोलकतालाई सस्तैमा समेट्न चेन्नईका दिपक चाहरले ४ ओभरमा २० रन खर्चेर ३ विकेट लिए । इमरान ताहिरले ४ ओभरमा २१ रन खर्चेर २, हरभजन सिंहले ४ ओभरमा १५ रन खर्चेर २ र रविन्द्र जेडेजाको नाममा १ विकेट रह्यो ।

यो जितसँगै चेन्नई ६ खेलमा ५ मा जित र १ मा हारका साथ १० अंक जोड्दै शीर्ष स्थानमा उक्लिएको छ । कोलकता ६ खेलमा ४ मा जित २ मा हारका साथ दोस्रो स्थानमा रहँदा किंग्स इलाभने पन्जाव ६ खेलमा ४ मा जित र २ मा हारका साथ तेस्रो स्थानमा यथावत छ । सनराइजर्स हैदरावाद ६ खेलमा समान ३ मा जित र हारका साथ चौथो स्थानमा छ ।

कोलकताले आफ्नो सातौं खेल १२ अप्रिलमा सन्दीप लामिछानेको टोली दिल्ली क्यापिटल्ससँग खेल्ने छ । त्यस्तै चेन्नईले ११ अप्रिलमा राजस्थान रोयल्ससँग भिड्ने छ ।