सुर्खेत (हाम्रो खेलकुद) – प्रदेश नम्वर ६ र ७ मा नेक्सस क्रिकेट एकेडेमीको आयोजना तथा ब्रम्हास्मी कलेजको मुख्य प्रायोजनमा हुने एसईई कप २०७६ का ट्यालेन्ट हन्टको प्रारम्भिक छनोट सम्पन्न भएको छ ।
देशभर ट्यालेन्ट हन्ट गरी प्रतिभावान युवा खेलाडीहरुको खोजीमा मेची महाकाली अभियानमा जुटेको टिम नेक्ससले प्रदेश ७ को धनगढी, महेन्द्रनगर र प्रदेश ६ को वीरेन्द्रनगरबाट २१ खेलाडी छनौट गरेको हो ।
धनगढी छनौट केन्द्रबाट अभिषेक कुवँर, गोबिन्द बिष्ट, डबल ऐर, हिमांशु भट्ट, बद्री भण्डारी, सुनिल भण्डारी, किशोर आचार्य, बिबेक न्यौपाने र ईन्द्र देउवाले प्रारम्भिक चरणमा स्थान बनाउन सफल भए ।
महेन्द्रनगरबाट प्रशान्त कार्की, दिलिप धानुक, प्रेम बोहोरा, गौतम बडु, हरिश पन्त, रोबिन क्षेत्री, उमेश बुढा, धिरेन्द्र ठाकुर र महेन्द्र ठगुन्ना छनोट भए । सुर्खेतबाट सुरज बुढाथोकी, मोहन गुरुङ र सुमित माझी छनोट हुन सफल भए ।
हरेक छनोट केन्द्रमा स्थानिय संयोजक, प्रशिक्षक र नेक्सस क्रिकेट एकेडेमीका उपाध्यक्ष प्रबल गौतम सदस्य रहेको ३ सदस्यीय छनौट समितिले ट्यालेन्ट हन्ट बाट खेलाडी छनोट गरेको हो ।
चैत्र २२ गते देखी शुरु भएको ब्रम्हास्मी ट्यालेन्ट हन्ट बैशाख १६ गतेसम्म देश भरका १२ स्थानमा हुनेछन् । १२ छनौट केन्द्रबाट १०० खेलाडी छनोट गरि काठमाडौंमा बैशाख १८ गते देखी २४ गते सम्म बन्द प्रशिक्षण गराइनेछ ।
बन्द प्रशिक्षणबाट अन्तिम ४८ जना खेलाडी छनोट गरिनेछ । ट्यालेन्ट हन्टबाट छनोट भएका खेलाडी सम्मिलित ८ टिमको सहभागितामा एक दिबसीय एसईई प्रतियोगिता सम्पन्न गरिने आयोजक नेक्सस क्रिकेट एकेडेमीकी प्रबन्धक सरस्वती शाहीले जानकारी गराइन् ।
कलेजले ट्यालेन्ट हन्टमा सहभागी सबै खेलाडीहरुलाई आंशिक तथा एसईई कपमा उत्कृष्ट प्रदर्शन गर्ने १४ खेलाडीलाई पुर्ण छात्रवृत्तिमा अध्ययन गराउने कलेजका एकेडेमिक निर्देशक सुनन्द रेग्मीले जानकारी गराए ।
