एजेन्सी – ओपनर अजिंक्या रहाणेले आफ्नो आईपीएल करियरकै उत्कृष्ट शतक प्रहार गरेपछि इन्डियन प्रिमियर लिग (आईपीएल) को ४० औं खेलमा राजिस्थान रोयल्सले दिल्ली क्यापिटल्सलाई १ सय ९२ रनको विशाल लक्ष्य दिएको छ ।
घरेलु मैदान जयपुरमा टस हारेर पहिला ब्याटिङ थालेको राजिस्थानले निर्धारित २० ओभरमा ६ विकेटको क्षतिमा १ सय ९१ रन बनायो । राजस्थानका लागि ओपनर अजिंक्या रहाणेले शानदार शतक प्रहार गरे । १७ ओभरको दोस्रो बलमा ईशान्त शर्मालाई २ बटुल्दै रहाणेले आफ्नो आईपीएल करियरमा दोस्रो शतक प्रहार पुरा गरेका थिए । ५८ बलमा शतक पुरा गरेका रहाणेको यो आईपीएल करियरकै सवोत्कृष्ट प्रर्दशन समेत हो ।
रहाणे ६३ बलमा ११ चौका र ३ छक्का सहित १ सय ५ रनमा अविजित रहे । अजिंक्या रहाणे र कप्तान स्टिभ स्मिथले दोस्रो विकेटका लागि १२ ओभरमा १ सय ३० रनको साझेदारी गर्दै राजिस्थानलाई विशाल योगफल सम्म पुर्याए ।
१४ ओभरको पहिलो बलमा अक्षर पटेलले बाउन्ड्री लाईन नजिकै क्रिस मोरिसबाट क्याच आउट गराउनु अघि कप्तान स्मिथले ३२ बलमा ८ चौका प्रहार गर्दै ५० रनमा आउट भए । दोस्रो ओभरको पहिलो बलमै ओपनर सन्जु स्यामसन शून्यमा रन आउट भएका थिए ।
बेन स्ट्रोक्स ८,एस्टन टर्नर शून्य र स्टुअर्ट बिन्नी १९ रनमा आउट भए । दिल्लीका कागीसो रबडाले २, ईशान्त शर्मा,क्रिस मोरिस र अक्षर पटेलले समान एक विकेट लिए । दिल्लीले आजको खेलमा नेपाली लेग स्पिनर सन्दीप लामिछानेलाई टोलीमा मौका दिएको छैन ।
