एजेन्सी – इन्डियन प्रिमियर लिग (आईपीएल) को ४४ औं खेलमा आज चेन्नई सुपर किंग्स र मुम्बई इन्डियन्सबीच प्रतिस्पर्धा हुँदैछ ।

खेल नेपाली समय अनुसार बेलुका ८:१५ देखी चेन्नईको घरेलु मैदान एमए स्टेडियममा सुरु हुने छ । यस अघि मुम्बईको घरेलु मैदानमा चेन्नई ३७ रनले पराजित भएको थियो । शीर्ष स्थानमा रहेको चेन्नई र तेस्रो स्थानमा रहेको मुम्बईबीचको भिडन्त रोचक हुने अनुमान गरिएको छ ।

चेन्नई आजको खेलमा विजयी भए दुई खेल अगावै प्ले अफमा पुग्ने पहिलो टोली बन्ने छ । मुम्बई विजयी भए प्ले अफ बलियो बन्ने छ । जारी आईपीएलमा चेन्नईले ११ खेलमा ८ मा जित र ३ मा हारका साथ १६ अंक जोड्दै शीर्ष स्थानमा छ । मुम्बईले १० खेलमा ६ मा जित र ४ मा हारका साथ तेस्रो स्थानमा छ । मुम्बई आजको खेलमा विजयी भए दोस्रो स्थानमा उक्लिने छ ।

चेन्नईका शेन वाटशन, इमरान ताहिर, रविन्द्र जडेजा, सुरेश रैना, फाफ डु प्लेसिस, हरभजन सिंह प्रमुख हतियार तथा जारी आईपीएलमा उत्कृष्ट प्रर्दशन गरि रहेका खेलाडी हुन् । मुम्बईका हार्दिक पान्ड्या, काइरन पोलार्ड, क्विन्टन डी कक, जसप्रित बुमराहको यस सिजनको आईपीएलमा प्रर्दशन उत्कृष्ट छ ।