एजेन्सी – नेपालले एसीसी यू१६ इस्टर्न रिजन क्रिकेट प्रतियोगिताको उपाधि जितेको छ । आइतबार फाईनल खेलमा मलेसियालाई ५९ रनले पराजित गर्दै नेपालले उपाधि जितेको हो । नेपालका कप्तान विशाल विक्रम केसी ‘म्यान अफ द सिरिज’ चुनिए ।

• 

उनले प्रतियोगिताभर ५ खेलमा ९३ रन बनाउनुका साथै ४ विकेट लिए । नेपाललाई उपाधी दिलाउन उनको उत्कृष्ट अलराउण्डर प्रर्दशन रह्यो ।

५ खेलमा ९ विकेट लिएका मलेसियाका सचिनु हेतेगे प्रतियोगिताको उत्कृष्ट बलर चुनिए । सिंगापुरमा ग्रिन राहुल गुनी प्रतियोगिताको सवोत्कृष्ट ब्याट्सम्यान घोषित भए । प्रतियोगिताकै सर्वाधिक रन बनाउने खेलाडी बनेका उनले चार खेलमा १ शतक,एक अर्ध शतक सहित २ सय रन बनाए ।

अप्रिल २० देखी सुरु भएको प्रतियोगितामा ८ देशको सहभागिता थियो । समूह ए मा नेपाल, मलेसिया,थाइल्यान्ड ,म्यानमार र समुह बी मा सिंगापुर,भुटान,हङकङ,चीन थिए । नेपालले समुह चरणमा म्यानमारलाई ७ विकेट र मलेसियालाई ३९ रनले पराजित गरेको थियो ।

थाईल्यान्डसँगको खेल वर्षाको कारण रद्ध हुँदा समुह ए को विजेता बन्दै सेमिफाईनलमा प्रवेश गरेको थियो । सेमिफाईनलमा नेपालले हङकङलाई ४ विकेटले पराजित गरेको थियो ।जारी प्रतियोगितामा नेपालले अपराजित रहँदै उपाधि जित्न सफल भएको हो ।