सुर्खेत(हाम्रो खेलकुद) – सुर्खेतमा जारी दोस्रो संस्करणको वाई वाई कर्णाली प्रिमियर लिगमा आइतबार सशस्त्र प्रहरी बल (एपीएफ) र मध्य पश्चिम क्रिकेट क्लव विजयी भएका छन् । एपीएफले न्यु होराइजन बुटवललाई ३८ रन र मध्यपश्चिमले लालिगुरास क्रिकेट क्लबलाई ७ विकेटले पराजित गर्यो ।
सुर्खेत स्थित कालिन्चोक क्रिकेट मैदानमा टस जितेर पहिला ब्याटिङ थालेको एपीएफले निर्धारित २० ओभरमा ८ विकेट गुमाउँदै १ सय ५३ रन बनाएको थियो । एपीएफका शंकर रानाले २८ बलमा ४ छक्का र १ चौका सहित ४८,शरद भेषवाकरले ४१,अनिल कुमार शाह २६,सन्दीप जोरा १३ र प्रदीप ऐरी १३ रनमा आउट भए । न्यु होराइजनका राहुल प्रजापति र अर्जुन रायमाझीले समान ३ विकेट लिए । राहुलले १९ ओभरको चौथो बलमा अमर सिंह राउटेला,पाँचौ बलमा सन्दीप जोरा र अन्तिम बलमा सुमित महर्जनलाई लगातार आउट गर्दै ह्याट्रिय पुरा गरे पनि त्यो जितको लागि काम लागेन ।
१ सय ५४ रनको लक्ष्य पछ्पाएको वुटवलले निर्धारित २० ओभरमा ८ विकेट गुमाउँदै १ सय १५ रन मात्र बनाउन सक्यो । उसका लागि सुरज दराई ४०,विशाल सुनार १४,निश्चिल चौधरी २१,सुवेन्द्र पान्डे १३ र सुनिल धमला सुन्यमा आउट भए । एपीएफलाई जिताउन यज्ञमान कुमाल ३,भुवन कार्की र शरद भेषवाकरले समान दुई विकेट लिए ।
त्यस्तै आइतबार भएको पहिलो खेलमा मध्यपश्चिमले लालीगुरासलाई ७ विकेटले हरायो । टस जितेर ब्याटिङ थालेको लालीगुरासले निर्धारित २० ओभरमा ९ विकेट गुमाउँदै १ सय ११ रन बनाएको थियो ।
उसका लागि प्रकाश पटेल ३०,धनुष थापा १८ र अजय यादवले १२ रन जोडे । मध्यपश्चिमका आकश विष्ट अजय साहनीले समान ३ विकेट लिए । १ सय १२ रनको लक्ष्य पछ्पाएको मध्यपश्चिमले १५ ओभरमा ३ विकेट गुमाउदै पुरा गर्यो । उसका लागि सैलेन्द्र यादव ५३ र विशाल गुप्ताले ४५ रन जोडे ।
