काठमाडौं (हाम्रो खेलकुद) – बुधबार देखी सुरु हुने मनमोहन स्मृति अन्तर प्रदेश यु–१६ राष्ट्रिय क्रिकेट प्रतियोगिताको सम्पूर्ण तयारी पूरा भएको छ ।
आयोजक मनमोहन मेमोरियल क्रिकेट सेन्टरले सोमबार राजधानीमा पत्रकार सम्मेलन आयोजना गर्दै प्रतियोगिताको सम्पूर्ण तयारी पुरा भएको बताएको छ ।
प्रतियोगिता कीर्तिपुर त्रिवि क्रिकेट मैदानमा बैशाख १८ देखी २४ गते सम्म चल्ने छ । सहभागी टिमलाई दुई समूहमा विभाजन गरी लिग कम नकआउट आधारमा खेल खेलाइने छ । शीर्ष दुई दुई टोली सेमिफाईनलमा प्रवेश गर्ने छन् । खेल ३० ओभरको हुनेछ ।
प्रतियोगिताका सहभागी खेलाडीले सेतो रंगको जर्सी,ट्राउजर लगाउने र रातो बल खेलाइने बताइएको छ । प्रतियोगिताको समूह ए मा प्रदेश नं ३, कर्णाली, गण्डकी र ७ तथा समूह बीमा प्रदेश नं १, २ र ५ रहेका छन् ।
विजेता टोलीले ५ लाख प्राप्त गर्ने छ । विजेताले २ लाख ५० हजार नगद साथै २ लाख ५० हजारको खेलकुद सामग्री प्राप्त गर्ने आयोजकले जनाएको छ । त्यस्तै उप विजेता टोलीले १ लाख २५ हजार नगद र सो सरहको खेलकुद सामग्री पाउने आयोजकले जनाएको छ ।
सम्रगमा उप विजेताले २ लाख ५० हजार पाउने छ । नेपाली राष्ट्रिय क्रिकेट टोलीका प्रशिक्षक जगत टमाटाले सेतो युनिफर्म र रातो बलले खेलाउदा क्रिकेटको सस्कृती जोगिरहने बताए ।
उद्घाटन खेल गण्डकी प्रदेश र प्रदेश नम्बर ३ बीच दिउँसो १२ : १५ देखी सुरु हुने छ । फाईनल बाहेक अन्य सबै दिन विहान ८ : ३० र दिउँसो १ : १५ बाट टियु मैदानमा खेल सुरु हुनेछ ।
