एजेन्सी – इन्डियन प्रिमियर लिग (आईपीएल) को ५० औं खेलमा आज चेन्नई सुपर किंग्स र दिल्ली क्यापिटल्सबीच प्रतिस्पर्धा हुँदै छ । खेल नेपाली समय अनुसार बेलुका ८ : १५ देखी चेन्नईको घरेलु मैदान एमए चिन्दरम स्टेडियमा सुरु हुनेछ ।

चेन्नई र दिल्ली दुवै टोलीले प्ले अफमा स्थान बनाई सकेका छन् । आजको खेल विजयी हुने टोलीको शीर्ष दुईमा रहेर सोझैं क्वालिफायर खेल्ने संभावना बलियो बन्ने छ । यसअघि दिल्लीको घरेलु मैदानमा चेन्नई ६ विकेटले विजयी भएको थियो । दिल्ली १२ खेलमा ८ मा जित र ४ मा हारका साथ १६ अंक जोड्दै शीर्ष स्थानमा छ । चेन्नईको पनि समान खेल र नतिजाका साथ नेट रन रेटमा पछि पर्दै दोस्रो स्थानमा छ ।

चेन्नईका कप्तान महेन्द्र सिंह धोनी फिट भएका छन् । तर उनि खेल्ने नखेल्ने भने अनिश्चित रहेको छ । धोनी यस अघि मुम्बई इन्डियन्सको खेलमा चेन्नईको टोलीमा थिएनन् । त्यस्तै मुम्बईसँगको खेलमा आराम पाएका रविन्द्र जडेजा र फाफ डु प्लेसिस पनि टोलीमा फर्किने छन् ।

सन्दीपको संभावना न्युन !

चेन्नईविरुद्ध नेपाली लेग स्पिनर सन्दीप लामिछानेको संभावना न्युन देखिन्छ । सन्दीपले जारी आईपीएलमा ६ खेलमा ८ विकेट लिएका छन् । पछिल्लो खेलमा सन्दीपले बेंगलोरविरुद्ध ३ ओभरमा ३६ रन खर्चिदै खराव प्रर्दशन गरेका थिए । जुन प्रर्दशनको कारण सन्दीपलाई आज टोलीमा स्थान बनाउन कठिन पर्न सक्ने देखिन्छ । दिल्लीले सन्दीपलाई ६ खेलमा मौका दिएको छ । जस मध्य ४ खेलमा आफ्नै घरेलु मैदान फिरोज शाह कोटला रहेको छ ।

अर्थात अवे मैदानमा दुई खेलमा मात्र मौका पाएका छन् । केहि खेलमा दिल्लीले कोटलामा सन्दीप र अन्य मैदानमा प्राय अफ्रिका अलराउण्डर क्रिस मोरिसलाई मौका दिएको छ । आज सन्दीपको स्थानमा दिल्लीले मोरिसलाई मैदान उतार्न सक्छ ।

चार विदेशी कोटामा कागिसो रबडा दिल्लीको टोलीमा निश्चित छ । त्यस्तै मिडिल अडरका कोलिन इनग्रामको पनि उच्च संभावना देखिन्छ । बेंगलोरविरुद्ध उत्कृष्ट अलराण्डर प्रर्दशन गरेका शेरफेन रदरफोर्डको पनि दिल्लीले विकल्प खोज्ने संभावना देखिदैन । सन्दीप,मोरिस र किमो पल मध्य एकले मौका पाउने छन् । पछिल्ला खेलमा पल र सन्दीपको प्रर्दशन खराव रहँदा मोरिस पहिलो रोजाईमा पर्न सक्छन् ।

अमित मिश्राले बेंगलोरविरुद्ध ४ ओभरमा २९ रन खर्चिएर २ विकेट लिएपछि सन्दीपको संभावना झनै कमजोर भएको हो । मिश्रालाई दिल्लीले आजको खेलमा पहिलो रोजाईको प्रमुख स्पिनरको रुपमा खेलाउने संभावना उच्च छ । यद्ययी चेन्नईको मैदान स्पिनर उपयोगि हुँदा मिश्रा र सन्दीप दुबैले मौका पाउन सक्छन् ।

स्पिनरलाई सहयोग पुग्ने पिच भएकाले चेन्नईले पछिल्लो खेलमा दुई विदेशी स्पिनर मिचेल सान्टनर र इमरान ताहिरसहित हरभजन सिंहलाई खेलाएको थियो । खेलाडी परिवर्तन गरि राख्दा टोलीको प्रर्दशनमा असर पुग्ने हुँदा दिल्लीले बेंगलोरसँगको टोलीलाईनै निरन्तरता दिन पनि सक्ने संभावना त्यतिकै छ ।