सुर्खेत (हाम्रो खेलकुद) – विभागीय टोली त्रिभुवन आर्मी क्लब र न्यु होराइजन बुटवल दोस्रो संस्करणको वाईवाई कर्णाली प्रिमियर लिग (केपीएल) को फाइनलमा प्रवेश गरेका छन् ।

सुर्खेत स्थित कालिन्चोक क्रिकेट मैदानमा शुक्रबार भएको सेमिफाइनलमा त्रिभुवन आर्मी क्लबले सशस्त्र प्रहरी बल (एपीएफ) लाई १ विकेटले हराउँदै फाइनलमा प्रवेश गर्यो । ८७ रनको विजयी लक्ष्य पछ्याएको आर्मीले १७.४ ओभरमा ९ विकेटको क्षतिमा पुरा गरेको हो । आर्मीका लागि सोमपाल कामीले २२ बलमा ३ चौका र १ छक्का सहित ३१ रनको महत्वपूर्ण योगदान दिए ।

त्यस्तै जितेन्द्र मुखिया र रोहित कुमार पौडेलले समान १२ र भिम सार्कीले ९ रन बनाउन बाहेक अन्यले राम्रो प्रर्दशन गर्न सकेनन् । एपीएफका कमल सिंह ऐरी र योज्ञमान कुमालले समान दुई विकेट लिए । त्यस्तै अमर सिंह राउटेला,भुवन कार्की र शरद भेषवाकरको नाममा समान १ विकेट रह्यो ।

त्यसअघि टस जितेर पहिला ब्याटिङ थालेको एपीएफले १८ ओभरमा अल आउट हुँदै ८६ रनमा समेटिएको थियो । एपीएफका लागि शरद भेषवाकरले सर्वाधिक ३० रन बनाए । भुवन कार्की १९,शंकर राना १२,परन बिक १३,सन्दीप जोरा १ रनमा आउट भए । अन्य खेलाडीको प्रर्दशन सन्तोकजनक रहेन । आर्मीका सोमपाल कामीले ३,सुसन भारीले २ तथा जितेन्द्र मुखिया र साहव आलमले समान १-१ विकेट हात पारे । अलराउन्ड प्रर्दशन गरेका सोमपाल म्यान अफ द म्याच चुनिए ।

दिनको पहिलो सेमिफाइनलमा शक्ति गौचन कप्तानीको होराइजनले आयोजक कर्णाली-११ लाई ३ विकेटले पराजित गर्दै फाईनलमा पुगेको हो । वर्षा र हावाहुरीको कारण १३ ओभरमा छोट्याइएको खेलमा टस हारेर ब्याटिङ थालेको कर्णाली-११ ले ४ विकेटको क्षतिमा ६२ रन बनाएको थियो । कर्णाली-११ को लागि कृष्ण कार्कीले सर्वाधिक ३३ रन बनाए। उनले ३१ बलमा ३ चौका र १ छक्का प्रहार गरे होराइजनका शक्ति गौचनले २ विकेट लिए।

६३ रनको लक्ष्य होराइजन बुटवलले ११.५ ओभरमा ७ विकेट गुमाएर पुरा गर्यो । उसका लागि शुबेन्दु पाण्डेले १८, निश्चल चौधरीले १०, बिशाल सुनारले अविजित १० तथा सुनिल धमलाले ८ रन बनाए। किशोर महतोले कर्णाली-११ को लागि ३ विकेट तथा प्रकाश जैसीले २ विकेट लिए पनि स्थानीय टिमलाई जित दिलाउन सकेनन् । प्लेयर अफ द म्याच शक्ति गौचन चुनिए।

विजेता दुई टोलीबीच उपाधिका लागि शनिबार प्रतिस्पर्धा हुने छ । कर्णाली क्रिकेट एकेडेमीद्वारा आयोजित प्रतियोगिताको विजेताले नगद ५ लाख रुपैयाँ तथा उपविजेताले नगद २ लाख रुपैयाँ प्राप्त गर्नेछन् । प्रतियोगितामा उत्कृष्ट घोषित हुने बलर र ब्याट्सम्यानले समान २० हजार र प्लेयर अफ द सिरिजले ५० हजार रुपैयाँ पाउनेछन् ।