एजेन्सी – आयरल्यान्डसँगको एक मात्र वान डे खेलमा पाहुना टोली इंग्ल्यान्डले संघर्षपूर्ण जित निकालेको छ । शुक्रबार राती सम्पन्न खेलमा इंग्ल्यान्ड ४ विकेटले विजयी भएको हो ।

आयरल्यान्डको डब्लिनमा वर्षाले प्रभावित खेलमा ओभर घटाएर ४५ मा झारिएको थियो । १ सय ९९ रनको लक्ष्य पछ्याएको इंग्ल्यान्डले ४२ ओभरमा ६ विकेट गुमाउँदै पुरा गर्यो । उसका लागि यसै खेलबाट इंग्ल्यान्डको टोलीमा डेब्यू गरेका बेन फोक्सले ७६ बलमा ३ चौका र १ छक्का सहित ६१ रनमा अविजित रहदै खेल जिताए ।

त्यस्तै टम करनले ५६ बलमा ५ चौका सहित ४६ रनमा अविजित रहे । एक समय १०१-६ को अवस्थामा पुगेको इंग्ल्यान्डलाई करन र फोक्सले सातौं विकेटका लागि अविजित रहँदै ९८ रनको साझेदी गर्दै जित पक्का गरे । ओपनर जेम्स भिन्स १८,डेविड मलान २४, जो रुट ७,कप्तान ओइन मोर्गन शून्य र डेविड विल्ली २० रनमा आउटभए पछि इंग्ल्यान्ड संकटमा परेको थियो ।

आयरल्यान्डका लागि जोशुआ लिटिलले ४ विकेट लिएपनि टोलीको हार टर्न सकेन । त्यस अघि टस हारेर पहिला ब्याटिङको निम्तो पाएको आयरल्यान्डले ४३.१ ओभरमा अल आउट हुँदै १ सय ९८ रनमा समेटिएको थियो ।

उसका लागि ओपनर पल स्टरर्लिङ्ग ३३,मार्क रिचर्ड अदिर ३२,जर्ज डोकरेल २४,एन्ड्रयू बलबर्नी २९ रनको योगदान दिए । इंल्यान्डका लागि लियाम प्लन्केट ४, टम कुरन ३,जोफ्रा आर्चर,आदिल राशिद र जो डेनलीले समान १ विकेट लिए । जोफ्रा आर्चरको डेब्यू खेल समेत हो ।

अव इंग्ल्यान्डले पाकिस्तानसँग एक टी ट्वान्टी र पाँच वान डे खेल खेल्ने छ ।