काठमाडौं (हाम्रो खेलकुद) – विभागीय टोली त्रिभुवन आर्मी क्लबले दोस्रो संस्करणको वाईवाई कर्णाली प्रिमियर लिग (केपीएल) को उपाधि जितेको छ । न्यु होराइजन बुटवल लाई शनिबार फाइनलमा ५९ रनले पराजित गर्दै आर्मी च्याम्पियन बनेको हो । आर्मीले उपाधिसहित ५ लाख र दोस्रो भएको न्यु होराइजनले २ लाख रुपैयाँ प्राप्त गर्यो ।

सुर्खेतको कालिन्चोक क्रिकेट मैदानमा भएको खेलमा आर्मीले टस जितेर पहिला ब्याटिङ गर्दै २० ओभरमा ६ विकेटको क्षतिमा १ सय ४६ रन बनाएको थियो । टोलीका लागि हरि बहादुर चौहानले ५६ बलमा ७ चौका प्रहार गरि ५६ रनको योगदान दिए । त्यस्तै राजु रिजाल ३४,कुशल मल्ल ६,रोहित कुमार पौडेल ७,सोमापाल कामी २ रनमा आउट हुँदा भिम सार्की २१ रनमा अविजित रहे । बुटबलका विकाश श्रेष्ठले २ विकेट लिए ।

१ सय ४७ रनको लक्ष्य पछ्याएको बुटवल १८.३ ओभरमा अल आउट हुँदै ८७ रनमा समेटियो । टोलीका विशाल सुनारले २६,निश्चल चौधरी १९,सुनिल धमला ११ र राहुल प्रजापतिले १२ रन बनाउन बाहेक अन्यले सम्झन योग्य प्रर्दशन गर्न सकेनन् ।

आर्मीका जितेन्द्र मुखिया र साहब आलमले समान ३ विकेट लिए । सुसन भारीले २ र सोमपाल कामीको नाममा १ विकेट रह्यो । बैशाख १२ देखी सुरु भएको लिगमा ८ टोलीको सहभागिता थियो । गत संस्करणको फाइनलमा आर्मीले आर्मीले रुपन्देहीलाई हराएको थियो ।

राष्ट्रिय टोलीबाट सन्न्यास लिई सकेका न्यु होराइजनका कप्तान शक्ति गौचन प्रतियोगिताकै उत्कृष्ट खेलाडी घोषित हुँदै नगद ५० हजार रुपैयाँ प्राप्त गरे। प्रतियोगिताको उत्कृष्ट ब्याट्सम्यान कर्णाली-११ का रबिन्द्र जंग शाही तथा उत्कृष्ट बलर आर्मीका सुसन भारी चुनिए । दुवैले जनही २० हजार नगद प्राप्त गरे ।