एजेन्सी – इन्डियन प्रिमियर लिग (आईपीएल)को लिग चरणको अन्तिम खेलमा कोलकता नाइट राइडर्सले मुम्बई इन्डियन्सलाई १ सय ३४ रनको समान्य लक्ष्य दिएको छ ।

मुम्बईको घरेलु मैदान वानखडेमा टस हारेर पहिला ब्याटिङ थालेको कोलकताले निर्धारित २० ओभरमा ७ विकेटको क्षतिमा १ सय ३३ रन बनायो । कोलकताका लागि रोविन उथप्पाले ४० रन बनाए । उथप्पा ४७ बलमा १ चौका र ३ छक्का प्रहार गरे ।

ओपनर सुभमन गिल र क्रिस लिनले पहिलो विकेटका लागि ६ ओभरमा ४९ रनको साझेदारी गर्दै राम्रो सुरुवात दिलाएका थिए । सातौ ओभरको पहिलो बलमा हार्दिक पान्ड्याले गिललाई ९ रनमा एलवी डब्लू आउट गरे । नबौं ओभरको दोस्रो बलमा लिनलाई पान्ड्यालेनै क्विन्टन डी ककबाट ४१ रनमा क्याच आउट गराए ।

लिनले २९ बलमा ४ छक्का र २ चौका प्रहार गरे । १३ औं ओभरको चौथो बलमा दिनेश कार्तिक र पाँचौ बलमा आन्द्रे रसेललाई लाथिस मलिङ्गाले क्याच आउट गराएपछि कोलकता संकटमा परेको थियो । रसेल डक र कार्तिक ३ रनमा आउट भए ।

तल्लोक्रमका नितेश रानाले १३ बलमा ३ चौका सहित २६ रनको योगदान दिए । मलिङ्गाले ४ ओभरमा ३५ रन खर्चेर ३ विकेट लिए । त्यस्तै हार्दिक पान्ड्या र जसप्रित बुमराको नाममा समान २ विकेट रह्यो । मुम्बई आजको खेलमा विजयी भए क्यालिफायरमा स्थान बनाउने छ । कोलकता विजयी भए प्ले अफमा पग्ने छ ।