काठमाडौं (हाम्रो खेलकुद) – धुर्मुस सुन्तली फाउन्डेसनले निमार्ण गर्न लागेको गौतम बुद्ध अन्तर्राष्ट्रिय रंगशालाको पश्चिमतर्फको अस्थायी बार भत्काउनेलाई कारबाही गर्न गौतम बुद्ध अन्तर्राष्ट्रिय रंगशाला निर्माण परियोजना खेलकुद विकास समितिले माग गरेको छ ।
बिहीबार खेलकुद विकास समितिका संयोजक दीपक विष्टले एक प्रेस विज्ञप्ती जारी गर्दै कडा कारबाहीको माग गरेका छन् । ‘रंगशाला परियोजनाको पश्चिमतर्फको अस्थायी बार केहि स्थानियहरुको समूहले मंगलबार बिहान डोजर लगाएर भत्काएको भन्ने खबरले हामी दुःखी भएका छौं । देशकै गौरव बोकेको परियोजना निर्माणमा अवरोध पुग्ने गरि जुन घटना भएको छ त्यसमा घोर भर्त्सना गर्दै दोषीमाथि कारवाहीको जोडदार माग गर्दछौं’, विज्ञप्तीमा भनिएको छ ।
अभियानलाई सहयोग गर्न सकिन्न भने असहयोग पनि नगर्न आग्रह गरिएको छ । विज्ञप्तीमा छिटो भन्दा छिटो निर्माण कार्यलाई अघि बढाउने वातावरण तयार पार्न सरकार, भरतपुर महानगरपालिका र सम्बन्धित निकायको ध्यानाकर्षण पनि गराईएको छ । संयोजक विष्टले जारी गरिएको विज्ञप्तीमा फाउन्डेसनलाई आफ्नो योजनामा रत्तिभर विचलित नभई लाग्न आग्रह पनि आग्रह गरिएको छ ।
खेलकुद समितिमा हरि खड्का (फुटबल), संगीना वैद्य (तेक्वान्दो), भरत शाह (भलिबल), विनोद दास (क्रिकेट), गौरिका सिंह (पौडी), दिपक श्रेष्ठ (कराँते), रुबिना क्षेत्री (क्रिकेट), सरस्वती चौधरी (भलिबल), दिपक महर्जन (बक्सिङ), महेश्वर महर्जन (बडी बिल्डिङ), सावित्रा भण्डारी ‘साम्बा’ (फुटबल), अनिल गुरुङ (फुटबल) र छुम्बी लामालगायतको समिति रहेको संयोजक बिष्टले बताएका छन् ।
यो अभियानको सद्भावना दूतका रुपमा राष्ट्रिय क्रिकेट टिमका कप्तान पारस खड्का र राष्ट्रिय खेलाडी सन्दीप लामिछाने रहेका छन् ।
