काठमाडौं (हाम्रो खेलकुद) – तेस्रो संस्करणको प्रधानमन्त्री एक दिवसिय क्रिकेट प्रतियोगितामा शुक्रबार मुलपानी क्रिकेट मैदानमा भएको खेलमा गण्डकी प्रदेशले सशस्त्र प्रहरी बल एपीएफलाई १ सय २६ रनको सामान्य लक्ष्य दिएको छ ।
निर्धारित समय भन्दा केहि ढिला सुरु भएको खेलमा ४३ ओभरमा झारिएको थियो । टस हारेर पहिला ब्याटिङ थालेको गण्डकी ४१.२ ओभरमा अल आउट हुँदै १ सय २५ रनमा समेटियो । गण्डकीका लागि दिपेश श्रेष्ठले सर्वाधिक २७ रनको योगदान दिए । ३९ ओभरको तेस्रो बलमा भुवन कार्कीले बोल्ड आउट गर्नु अघि उनले ३५ बलमा २ चौका प्रहार गरे ।
ओपनर अनिल गुरुङ ११,राहुल शर्मा १४,आकाश थापा १९,विपिन खत्री १७ र किशोर महतोले १५ रन बटुले । अन्यले राम्रो प्रर्दशन गर्न सकेनन् । एपीएफका भुवन कार्कीले ९ ओभरमा २ मेडन सहित २२ रन खर्चेर ३ विकेट लिए । त्यस्तै शरद भेषवाकर,अमरसिंह राउटेला र योज्ञमान कुमालले समान २ विकेट लिए । कमलसिंह ऐरीको नाममा १ विकेट रह्यो ।
