काठमाडौ (हाम्रो खेलकुद) – तेस्रो संस्करणको प्रधानमन्त्री एकदिवसिय राष्ट्रिय क्रिकेट प्रतियोगिता अन्तर्गत आईतबार मुलपानी क्रिकेट मैदानमा विभागिय टोली एपीएफले प्रदेश ५ लाई १ सय ८५ रनको मध्यम लक्ष्य दिएको छ ।

मुलपानीमा टस जितर पहिला ब्याटिङ थालेको एपीएफ ४९.४ ओभरमा अल आउट हुँदै १ सय ८४ रनमा समेटियो । उसका लागि राष्ट्रिय टोलीका विकेटकीपर समेत रहेका प्रदीप ऐरी ७७ रनमा अविजित रहे । धैर्यताका साथ ब्याटिङ गरेका उनले १ सय ३१ बलमा ३ चौका र १ छक्का प्रहार गरे ।

प्रदीप बाहेक अन्य कुनै पनि ब्याट्सम्यानले राम्रो प्रर्दशन गर्न सकेनन् । प्रदपिलाई कुनै पनि ब्याट्सम्यानले राम्रो साथ दिन सकेनन् । प्रदीपले एकतर्फबाट रन जोड्दा अर्कोतर्फबाट निरन्तर विकेट गुम्न पुग्दा विभागिय टोली एपीएफ प्रदेशटिम माथी सामान्य योगफलमा समेटिनु परेको हो ।

सातौं ओभरको अन्तिम बलमा आशिफ शेख ११ रनमा क्याच आउट भए । १५ ओभरको दोस्रो बलमा सन्दीप सुनारले कृष्ण कार्कीबाट क्याच गराउनु अघि ओपनर शरद भेषवाकरले ४७ बलमा १४ रन जोडे । शंकर राना ६,सुमित महर्जन शुन्य,पृथु वास्कोटा ९ र भुवन कार्की १३ रनमा आउट भए । तल्लोक्रममा सन्दीप जोराले २२ बलमा २ चौका सहित २२,अमरसिंह राउटेला १,कमलसिंह ऐरी र अभिनाष बोहोरा समान ३ रनमा आउट भए ।

प्रदेश ५ का लागि कप्तान कृष्ण कार्कीले ८.४ ओभरमा १ मेडन सहित ३२ रन खर्चेर ३ विकेट लिए । त्यस्तै सन्दीप सुनारले २,बिक्रम भुषाल,सिद्धान्त शाही र अनिल खरेलको नाममा समान १ विकेट रह्यो ।