काठमाडौं (हाम्रो खेलकुद) – युवा ब्याट्सम्यान सौरभ खनालले उत्कृष्ट ब्याटिङ गरेपछि काठमाडौंमा जारी तेस्रो संस्करणको प्रधानमन्त्री राष्ट्रिय क्रिकेट प्रतियोगितामा प्रदेश ५ ले गण्डकी प्रदेशलाई ३ विकेटले पराजित गरेको छ ।

जितका लागि २ सय ३५ रनको लक्ष्य पक्ष्याएको प्रदेश ५ ले १ बल अगाडी ७ विकेट गुमाउँदै पुरा गर्यो । उसका लागि सौरभ खनालले ९० रनको महत्वपूर्ण योगदान दिए । सौरभले १ सय १२ बलमा १२ चौका प्रहार गरेपछि प्रदेश ५ को जित सम्भव बनेको हो । अन्तिम ओभरको तेस्रो बलमा दिपेश श्रेष्ठले सुवास भण्डारीबाट क्याच आउट गराएपछि सौरभ शतक पुरा गर्न चुके।

सौरभले प्रनित थापा मगरसँग चौथो विकेटका लागि उत्कृष्ट ९२ रनको साझेदारी गर्दै प्रदेश ५ को जित सहज बनाएका थिए । ४५ ओभरको तेस्रो बलमा रन आउट हुनु अघि प्रनितले ६६ बलमा ५ चौका प्रहार गर्दै ४५ रन जोडे । प्रदेश ५ ले ओपनर सन्दीप सुनार १७ र सुवेन्द्र पाण्डेलाई ११ रनमा गुमाएको थियो । २५ ओभरको पहिलो बलमा गोविन्द प्रधानले मेख सेनबाट क्याच आउट गराउनु अघि निश्चिल चौधरीले ५१ बलमा ४ चौका सहित ३३ रनमा आउट भए ।

कप्तान कृष्ण कार्कीले १२ बलमा समान १ चौका र छक्का सहित १३ रन जोडे । प्रकाश केसी ७ र जितेन्द्र सहानी १ रनमा अविजित रहे । गण्डकीका लागि किशोर महतोले २,विशाल पौडेल,गोविन्द प्रधान र दिपेश श्रेष्ठको नाममा समान १ विकेट रह्यो ।

त्यसअघि कीर्तिपुर स्थित टियु क्रिकेट मैदानमा टस जितेर पहिला ब्याटिङ थालेको गण्डकीले निर्धारित ४९.२ ओभरमा अल आउट हुँदै २ सय ३४ रन बनायो । उसका लागि ओपनर अनिल गुरुङले सानदार शतक प्रहार गरे पनि त्यो जितको लागि प्राप्त भएन । ४५ ओभरको अन्तिम बलमा कप्तान कृष्ण कार्कीलाई छक्का प्रहार गर्दै अनिल गुरुङले १ सय ४१ बलमा पीएम कपमा आफ्नो पहिलो शतक पुरा गरे । अन्तिम ओभरको पहिलो बलमा अनिल खरेलले विकेटकीपर प्रकाश केसीबाट स्टपम्ङि आउट गर्नु अघि १ सय ५२ बलमा ५ चौका र १ छक्का सहित १ सय १५ रनको योगदान दिए ।

त्यस्तै तल्लोक्रममा युवा खेलाडी किशोर महतोले ७ बलमा ३ छक्का सहित आक्रमक २० रन जोडे । गण्डकीले पहिलो विकेटका रुपमा कप्तान गोविन्द प्रधानलाई २६ रनमा गुमाएको थियो । ओपनर प्रधान र अनिलले पहिलो विकेटका लागि १५ ओभर सम्म ५४ रनको साझेदारी गर्दै मध्यम सुरुवात दिलाएका थिए । प्रधानलाई १६ ओभरको पहिलो बलमा विक्रम भुषालले क्याच गराउनु अघि ४१ बलमा २ चौका र १ छक्का प्रहर गरे ।

दिपेश श्रेष्ठले २० बलमा २ छक्का र १ चौका सहित २८,सुमन घिमिरे १३ मेख शेन २३,विपिन खत्री ३ रनमा आउट भए । प्रदेश ५ का लागि अनिल खरेलले ९।२ ओभरमा २८ रन खर्चेर ५ विकेट लिए । विक्रम भुषाल र कृष्ण कार्कीको नाममा समान २ विकेट रह्यो । सिद्धान्त शाहीले १ विकेट लिए ।