एजेन्सी – एकदिवसिय विश्वकप क्रिकेट प्रतियोगिता अन्तर्गत शनिवारको पहिलो खेलमा उपाधिको दाबेदार भारतले अफगानिस्तानलाई २ सय २५ रनको मध्यम लक्ष्य दिएको छ ।
साउथह्याप्टनमा टस जितेर पहिला ब्याटिङ थालेको भारतले निर्धारित ५० ओभरमा ८ विकेटको क्षतिमा २ सय २४ रनमात्रै बनाउन सक्यो । भारतका लागि कप्तान विराट कोहलीले सर्वाधिक ६७ रनको योगदान दिए । ३१ ओभरको तेस्रो बलमा मोहम्मद नाबीले रमात शाहबाट क्याच आउट गराउनु अघि विराटले ६३ बलमा ५ चौका प्रहार गरे ।
भारतले ओपनर रोहित शर्मालाई १ रनमा गुमाएको थियो । उनलाई मुजिब उर रहमानले एलवी डब्लू आउट गरे । मोहम्मद नाबीले १५ ओभरको दोस्रो बलमा हज्रतुल्लाह जजाईबाट क्याच आउट गराउँदै अर्का ओपनर के एल राहुललाई ३० रनमा पेभिलिएन फर्काए । विजय शंकरलाई रहमात शाहले २९ रनमा एलवी डब्लू गरे । त्यस्तै विकेटकीपर महेन्द्रसिंह धोनीले ५२ बलमा ३ चौका सहित २८ रनमात्रै जोड्न सके ।
केदार जाधवले ६८ बलमा ३ चौका र १ छक्का सहित ५२ रनमा क्याच आउट भए । हार्दिक पान्ड्या ७ रनमा क्याच आउट भए ।अफगानिस्तानका लागि मोहम्मद नाबी र कप्तान गुलवदीन नाइबले समान २ विकेट हात पारे । राशिद खान, रमात शाह,मुजिव उर रहमान,अफ्तव आलमको नाममा समान १ विकेट रह्यो ।
