एजेन्सी – एकदिवसिय विश्वकप क्रिकेट प्रतियोगिता अन्तर्गत सोमबार बंगलादेश र अफगानिस्तान भिड्दै छन् । खेल नेपाली समय अनुसार दिउँसो ३ : १५ देखि साउथह्याप्टनमा सुरु हुने छ ।

सुरुवाती ६ खेलमानै पराजित हुँदै प्रतियोगिताबाट बाहिरि सकेको अफगानिस्तानको लागि आजको खेल प्रतिष्ठाको लडाईमात्र हुने छ । अंक बिहीन अफगानिस्तान पहिलो जितको खोजिमा छ ।

६ खेलमा २ मा जित र ३ मा हारका साथ ५ अंक बटुल्दै छैटौं स्थानमा रहेको बंगलादेशलाई भने आजको खेल जित्नै पर्ने दबाब छ । आजको खेलमा विजयी भए शीर्ष चारमा रहेर सेमिफाइनल खेल्ने आसा कायमै राख्ने छ । आजको खेलमा पराजित भए बंगलादेशको पनि सेमिफाइनल खेल्ने संभावना लगभग समाप्त हुने छ ।

भारतलाई कडा टक्कर दिएको अफगानिस्तानको मनोबल पनि उच्च रहने छ । प्रतियोगिताबाट बाहिरि सकेको अफगानिस्तान बिना दबाब मैदान उत्रने हुँदा उत्कृष्ट प्रर्दशन गर्दै बंगलादेशलाई स्तब्ध पार्न सक्छ ।

विश्वकपमा यी दुई देश १ पटक प्रतिस्पर्धा गर्दा बंगलादेश विजयी भएको छ । हेड टु हेडमा यी दुई देशबीच ७ वान डे खेल भएको छ । जसमा अफगानिस्तान ३ खेलमा विजयी हुँदा ४ खेलमा पराजित भएको छ ।

अष्टेलियासँगको खेलमा शतक प्रहार गरेका विकेटकीपर मुश्फिकुर रहिम आजको खेलमा पनि नायक सावित हुन सक्छन् । त्यस्तै जारी प्रतियोगितामा ५ खेलमा समान २ शतक र अर्धशतक सहित कुल ४ सय २५ रन जोडेका साकिब अल हसनको उत्कृष्ट प्रर्दशनमा बंगलादेशले सहज जित निकाल्न सक्छ ।

भारतसँगको खेलमा उत्कृष्ट प्रर्दशन गरेका मोहम्मद नाबीको प्रर्दशन आजको खेलमा पनि अफगानिस्तानलाई महत्वपूर्ण रहने छ । लेग स्पिनर राशिद खाने सोचे भन्दा खराव प्रर्दशन गर्नु अफगानिस्तानलाई ठूलो चिन्ताको विषय हो ।