नयाँ दिल्ली (एजेन्सी) – इन्डियन प्रिमियर लिग (आइपिएल)मा दोस्रो प्ले अफमा सनराइजर्स हैदाराबादलाई १ सय ६३ रनको लक्ष्य पाएको छ । पहिले ब्याटिङ गरेको गुजरात लायन्सले ७ विकेटको क्षेतिमा १ सय ६२ रन बनाएको छ ।
गुजरातका आरोन फिन्च ब्याटिङ गर्दै । उनले ५० रन बनाएका थिए ।
हैदराबादले टस जितेर गुजरातलाई पहिले ब्याटिङका लागि आमन्त्रण गरेको थियो । आरोन फिन्चले अर्धशतक पुरा गरेपछि गुजरातले प्रतिस्पर्धात्मक स्कोर खडा गरेको थियो । पाँचौं नम्बरमा ब्याटिङ अस्ट्रलियन फिन्चले ३२ बलमा ७ चौका र २ छक्कासहित ५० रन बनाएका थिए । उनी बेन बटिङको बलमा आउट भएका थिए । टोलीका ओपनर पूर्व न्युजिल्यान्ड कप्तान ब्रेन्डन म्याकलमले २९ बलमा ५ चौका साथ ३२ रन बनाए । रन आउट भएका दिनेश कार्तिकले २६ रन जोडेका थिए भने ड्वान ब्राभोले २० रन जोडे । रविन्द्र जडेजा अविजित १९ रनमा अविजित रहे ।
हैदराबादका भुवेश्नवर कुमार र कटिङले समान २ तथा विपुल शर्मा र ट्रेन्ट बोल्टले समान १ विकेट लिए । गुजरात र हैदराबादको विजेताले आइतबार रोयल च्यालेजर्स बैंगलोरसँग फाइनल खेल्नेछ । गुजराजले शीर्षस्थानमा रहँदै लिग चरणको अन्त्य गरेको थियो । तर पहिलो प्ले अफमा बैंगलोरसँग ६ विकेटको हारपछि गुजरातले अर्को एउटा चुनौति पार गर्नुपर्ने भयो ।
लिगमा चौथो स्थानमा रहेको हैदराबादले दुई पटकको च्याम्पियन कोलकाता नाइट राइडर्सलाई २२ रनले हराएर फाइनल खेल्ने सम्भावनालाई जीवित राखेको थियो । सन् २०१३ को संस्करणबाट आइपिएल खेल्न थालेको हैदराबादका लागि आजको दोस्रो प्ले अफ फाइनल पुग्नका लागि राम्रो मौका हो । किनकी हैदराबादले लिग चरणका दुवै खेलमा गुजरातलाई हराएको थियो ।
