बैंगलरु (एजेन्सी) –

रोयल च्यालेन्सर्ज बैंगलोरले आज घरेलु मैदानमा इन्डियन प्रिमियर लिग (आइपिएल–९) को फाइनलमा सनराइजर्स हैदराबादको सामना गर्नेछ ।

बैंगलोरका कप्तान विराट कोहलीले फाइनल प्रतिस्पर्धात्मक र स्तरीय हुने बताएका छन् । यसअघि दुई पटक फाइनल खेल्दा पनि बैंगलोर उपाधि जित्न सकेको छैन ।

२००९ मा दक्षिण अफ्रिकामा डेक्कन चार्जस र त्यसको दुई बर्षपछि चेन्नइ सुपर किङसंग पराजित भएको थियो । फाइनल पुग्नलाई यसपटक दुवैले गुजराज लायन्सलाई हराएका थिए । पहिलो प्ले अफमा बैगलोरसँग हारेको गुजरात दोस्रो प्ले अफमा हैदराबादसँग पराजित भएको थियो ।

गुजरातसँग खेल्नुअघि हैदराबादले शाहरुख खानको कोलकाता नाइट राइजर्सलाई हराएको थियो । ‘दर्शकले स्तरीय क्रिकेट फाइनल खेल्न हेर्न पाउनेछन् । दुवै टोलीमा रहेका खेलाडीलाई हेर्ने हो भने खेल प्रतिस्पर्धात्मक हुनेछ,’ कोहलीले भने ।

उनले पछिल्ला केही खेलमा हैदराबाद भन्दा आफ्नो टोलीले राम्रो प्रदर्शन गरिरहेको समेत बताए । कोहलीले भने,‘ समर्थकले हामीलाई अभ्यास सत्रमा पनि पछ्याएका थिए । हामी हार्दा वा जित्दा दुवैमा उनीहरुको साथ छ । फाइनलमा स्तरीय क्रिकेट खेल्न उनीहरुले हामीलाई हौसाउने छन् ।’