काठमाडौं (हाम्रो खेलकुद) – नेपाल क्रिकेट संघ(क्यान) लाई निलम्बन गरेको अन्तराष्ट्रिय क्रिकेट काउन्सिल (आईसीसी) ले नेपाली राष्ट्रिय टोलीको तयारी थाल्ने प्रक्रिया अघि बढाएको छ । विश्व क्रिकेट लिग च्याम्पियसिप अन्तर्गत नेदरल्यान्ड्ससँग हुने खेलको तयारीका लागि आइसिसीले निलम्बित क्यानकी प्रमुख कार्यकारी अधिकृत सिइओ भावना घिमिरेलाई निर्देशन दिएको ।

आईसीसीका ग्लोबल डेभलोपमेन्ट म्यानेजर टिम एण्डरसनले चतुरबहादुर चन्दको अध्यक्षतामा रहेको क्रिकेट संघको निर्वाचित समिति, रमेश सिलवालको नेतृत्वमा रहेको तदर्थ समिति र राष्ट्रिय खेलकुद परिषद् (राखेप) लाई पठाएको पत्रमा नेदरल्यान्ड्ससँगको खेलका लागि आफ्नो मातहतमा रहेर स्थानीय स्तरमा समन्वय गर्ने जिम्मेवारी सिईओ घिमिरेलाई दिइएको जानकारी दिएको छ ।
स्रोत भन्छ ‘आईसीसीले पत्र पठाएको छ । नेदरल्यान्ड्स भ्रमणका लागि नामिबियासँगको खेलको जस्तै प्रक्रिया अपनाइएको छ ।’ नामिबियासँगको काठमाडौंमा भएको खेल आइसिसीकै प्रत्यक्ष निगरानीमा भएको थियो । नामिबियाविरुद्धका दुवै खेल नेपालले जितेको थियो ।

विश्व क्रिकेट लिग च्याम्पियनपसिप अन्तरगत नेपालले साउन २९ र ३१ गते नेदरल्यान्ड्ससँग उसकै भूमिमा खेल्नेछ । च्याम्पियनसिपको तयारीका लागि नेपालले साउन ४ गते मेरिलिबोन क्रिकेट क्लब (एमसीसी)सँग अभ्यास खेल खेल्नेछ ।
नामिबियासँगको खेलमा जस्तै आईसीसीले खेलाडी छनोटको जिम्मा कप्तान पारस खड्का र प्रशिक्षक जगत टमाटालाई दिएको छ । भारतका पूर्व खेलाडी राजु बैंकटपति सल्लाहकारको भूमिका रहने बताइएको छ । नेपाली टोलीको नेदरल्यान्ड्स भ्रमणका लागि लाग्ने सबै खर्च आइसिसीले नै बेहोर्नेछ ।
आईसीसीले क्यानलाई दिने अनुदानको रोक्का रकमबाट नेपाली टोलीको खर्च गर्न सकिने उल्लेख गरेको छ। सन् २०१४ देखि आइसिसीले रोकेको क्यानको अनुदान ९ लाख अमेरिकी डलर पुगिसकेको छ ।