काठमाडौं (हाम्रो खेलकुद) – नेपाली क्रिकेट संघ (क्यान) को विवादले निकास पाउने सम्भावना बढेको छ । क्यानका ३९ जिल्ला र ६ प्रदेशको निर्वाचन सकिएकोले अब केन्द्रिय कार्यसमितिको निर्वाचन पूर्व निर्धारित तालिका अनुसार असोजको पहिलो साता हुने सम्भावना बढेको छ । क्यानमा प्रदेश ५ र ६ लाई एउटै प्रदेश मानिएको छ ।

आइसीसीले गठन गरेको स्वतन्त्र समितिले तयार पारेको कार्यतालिका अनुसार नै जिल्ला र प्रदेशको निर्वाचन सकिएकोले पूर्व निर्धारित समय अनुसार असोजको ३ र ४ मा निर्वाचन हुने सम्भावना रहेको समितिका सदस्य एबी क्षेत्रीले हाम्रो खेलकुदलाई जानकारी दिए ।

झण्डै साढे तीन वर्षदेखि क्यान अन्तर्राष्ट्रिय क्रिकेट परिषद् (आइसीसी) को निलम्बनमा रहेको छ । नेपाली क्रिकेटको आन्तरिक विवाद समाधान भएपछि मात्र आइसीसीले क्यानको निलम्बन फुकुवा गर्ने सम्भावना रहेको छ । क्षेत्रीका अनुसार केन्द्रिय साधारण सभामा जिल्ला र प्रदेशका प्रतिनिधि गरि ६० जना सँग मताधिकार रहेको छ । क्यानका सदस्य ३९ जिल्लाबाट प्रत्येकबाट १ तथा ६ प्रदेशबाट २१ जना प्रतिनिधि रहनेछन् ।

उनीहरुले क्यानको १७ सदस्यीय कार्यसमितिलाई निर्वाचित गर्नेछ । समितिमा एक उपाध्यक्ष, एक सचिव, एक कोषाध्यक्षर १३ सदस्य रहने वैधानिक व्यवस्था छ । राजनीतिक हस्तक्षेप र आन्तरिक द्वन्द्व देखाउँदै आइसीसीले क्यानलाई निलम्बन गरेको थियो । निलम्बन पछि नेपालले सबै अन्तर्राष्ट्रिय प्रतियोगिता आइसीसीको निर्गानीमा खेलिरहेको छ ।