काठमाडौं (हाम्रो खेलकुद)- सिंगापुरमा जारी त्रिकोणात्मक सिरिजअन्तर्गत नेपालले तेस्रो खेलमा आज जिम्बावेसँग प्रतिस्पर्धा गर्दैछ । खेल नेपाली समय अनुसार साँझ ५ः१५ बजे सुरु हुनेछ ।

जिम्बावेसँग पहिलो खेलमा जित नजिक पुगेको नेपाल डेथ ओभरमा बलिङ कमजोर हुँदा ५ विकेटले पराजित भएको थियो। दोस्रो खेलमा उत्कृष्ट पुनरागमन सहित सिंगापुरलाई ९ विकेटले पराजित गर्दै थुप्रै कीर्तिमान रचेको थियो । तेस्रो खेलमा जिम्बावे सिंगापुरसँग ४ रनले स्तब्ध भएपछि नेपाल अंक तालिकामा शीर्ष स्थानमा छ । तीनै टोलीको समान २ अंक भएपनि नेपाल नेट रन रेटका आधारले शीर्ष स्थानमा रहेको हो ।

दुवै खेलको प्रर्दशनले नेपालको मनोबल उच्च छ । जिम्बावेविरुद्ध पहिला ब्याटिङ गर्दै नेपालले २० ओभरमा ६ विकेटको क्षतिमा १ सय ३२ रन बनाएको थियो । जिम्बावेले १८.१ ओभरमा ५ विकेट गुमाउँदै पुरा गरेको थियो । एक समय १० ओभरमा ६४-५ को कमजोर अवस्थामा पुगेको जिम्बावेलाई छैटौं विकेटका लागि रेयान बर्ल र रिचमन्ड मुतुम्बामीले ६९ रनको अविजित साझेदारी गर्दै जित दिलाएका थिए । नेपालका यी तीन खेलाडी जसको उत्कृष्ट प्रर्दशनमा नेपालले टेष्ट टोली जिम्बावेलाई हराउन सक्छ ।

३. सन्दीप लामिछाने (लेग स्पिनर)

लेग स्पिनर सन्दीप लामिछानेले आफ्नो उत्कृष्ट प्रर्दशनमा जिम्बावेलाई निराश बनाउन सक्छन् । पहिलो खेलमा जिम्बावेका कप्तान सन विलियम्स सहित शीर्षक्रमका ३ ब्याट्सम्यानलाई शून्यमा पेभिलिएन फर्काएका थिए । उक्त खेलमा सन्दीपले ४ ओभरमा १५ रन खर्चेर ३ विकेट लिदा अन्य बलरको राम्रो साथ नपाउँदा पराजित हुन पुगेको थियो । दोस्रो खेलमा सन्दीपले सिंगापुरविरुद्ध ४ ओभरमा १८ रन मात्रै खर्चेका थिए । सन्दीपले आफ्नो उत्कृष्ट प्रर्दशनलाई निरन्तरता दिए जिम्बावेका ब्याट्सम्यानलाई पनि निराश बनाउन सक्छन् । जसको सहयोगमा नेपालले पहिलो पटक जिम्बावेलाई हराउन सक्छ । सन्दीपले १३ टि २० आईमा नेपालबाट १९ विकेट लिई सकेका छन् ।

२. अभिनाश बोहोरा (बलर)

तीब्र गतिका बलर अभिनाश बोहोरा योर्क बल फ्याक्नका माहिर छन् । डेथ ओभरका विशेष मानिने अभिनाशले जिम्बाबेका ब्याट्सम्यानलाई आजको खेलमा निराश बनाउन सक्छन् । अभिनाशले दुबै खेलमा कसिलो बलिङ गरेका छन् । पहिलो खेलमा जिम्बावेविरुद्ध २ ओभरमा ११ रन मात्रै खर्चेका थिए । उनको २ ओभर बाँकी राखेर दीपेन्द्र सिंह ऐरी र कुशल मल्ललाई डेर्थ ओभरमा बलिङ गराउँदा कप्तान पारस खड्काको आलोचना समेत भएको थियो । उनले दोस्रो खेलमा सिंगापुरविरुद्ध ३ ओभरमा १६ रन खर्चे।

गत माघमा यूएईविरुद्ध डेब्यू गरेका बोहोराले १० खेलमा १२ विकेट लिएका छन् । एसिया विश्वकप छनोटको निर्णायक खेलमा सिंगापुरविरुद्ध अन्य सबै नेपाली बलरले कमजोर प्रर्दशन गर्दा बोहोराले उत्कृष्ट प्रर्दशन गर्दै ४ ओभरमा ३५ रन खर्चेर ४ विकेट लिएका थिए । गत माघमा तीन टि२० सिरिज यूएईलाई २-१ ले हराउँदै ऐतिहासिक सिरिज जित्दा बोहोराको प्रर्दशन महत्वपूर्ण थियो । डेर्थ ओभरमा उत्कृष्ट बलरको छबि बनाएका अभिनाशले आफ्नो उत्कृष्ट प्रर्दशन गर्दै जिम्बावेलाई निराश बनाउन सक्छन् ।

१. पारस खड्का(कप्तान)

कप्तान पारस खड्का छन् र त नेपाली क्रिकेट यो स्थानमा छ । पारसलाई नेपाली क्रिकेटमा एकल योद्धा अर्थात ‘वान म्यान आर्मी’ भन्ने गरिन्छ । नेपालको जितमा पारसको प्रर्दशन सधैं निर्णायक हुने गर्दछ । पारसको कमजोर प्रर्दशनमा नेपालले विरलैमात्रमा जित निकालेको छ । नेपाली क्रिकेटमा बनेका अधिकाम्स कीर्तिमान पारसकै नाममा छन् । त्रिकोणात्मक सिरिजको पहिलो खेलमा जिम्बावेसँग पारस १८ रनमा आउट भएका थिए । दोस्रो खेलमा सिंगापुरलाई ९ विकेटले पराजित गर्न पारसले ५२ बलमा ९ छक्का र ७ चौका प्रहार गर्दै १ सय ६ रनमा अविजित रहेका थिए। पारस टि२० मा शतक प्रहार गर्ने नेपालको पहिलो ब्याट्सम्यान हुन् । लक्ष्य पछ्याउदा शतक प्रहार गर्ने पारस विश्वको पहिलो कप्तान पर्दछन् ।

सिंगापुर भ्रमणमा नेपालबाट पारस सर्वाधिक अनुभबी खेलाडी समेत हुन् । बलिङ र ब्याटिङ दुबैमा चम्किँने पारसको उत्कृष्ट प्रर्दशन विना नेपालको जित कठिन देखिन्छ । पारसले २१ टि२० आई इनिङमा १ शतक र ३ अर्ध शतक सहित कुल ६ सय ३१ रन बनाएका छन् । पारस पछिल्लो समय उत्कृष्ट लयमा छन् । पारसले पछिल्लो ७ खेलमा क्रमशः ८६,२३,२८,६८, १२,१८ र १ सय ६ रन जोडेका छन् । पारसले आफ्नो उत्कृष्ट इनिङमा विशाल योगफल बनाउन र सहज जित पक्का गर्न सक्छन् । पारसको उत्कृष्ट प्रर्दशनमा नेपालले जिम्बाबेलाई निराश बनाउन सक्छ ।