काठमाडौं (हाम्रो खेलकुद)– गत साता सम्पन्न नेपाल क्रिकेट संघ (क्यान) को निर्वाचनलाई स्वागत गर्दै अन्तर्राष्ट्रिय क्रिकेट परिषद् (आइसिसी) ले निलम्बन फुकुवाको लागि पहिलो शर्त पुरा भएको जनाएको छ । राजनीतिक हस्तक्षेपलगायतका कारण देखाउँदै आइसिसीले क्यानलाई २०७३ वैशाखमा निलम्बन गरेको थियो ।

विभिन्न चरण पार गर्दै आइसिसीकै प्रत्यक्ष संलग्नतामा असोज १० र ११ गते काठमाडौंमा क्यानको निर्वाचन सम्पन्न भएपछि अब क्यानको निलम्बन फुकुवा हुने अनुमान गरिएको छ । आइसिसीको बैठक अक्टबर १३ मा बस्ने र त्यसमा क्यान निलम्बन फुकुवा हुने अनुमान गरिएको छ ।

आइसिसीले मंगलबार विज्ञप्ती जारी गर्दै निर्वाचन सम्पन्न भएकोमा स्वागत गरेको छ । आइसिसीद्धारा गठित ५ सदस्यीय स्वतन्त्र समििितले निर्वाचन गरेको थियो । क्यान निवार्चनमा स्वतन्त्र समिकिा ३ प्रतिनिधि अंमर शेख (सिनियर म्यानेजर) ,मुहमम्द अली (आइसिसी आन्तरिक लेखा प्रमुख) ,नितिशा कोठारी (फाइनान्स अफिसर) ,लेख बहादुर क्षेत्री (राखेप प्रतिनिधि) र ठाकुर प्रताप थापा ( क्यानको पछिल्लो निर्वाचित समितिकातर्फबाट) सदस्य स्वतन्त्र टोली थिए ।

आइसिसीका उपाध्यक्ष इमरान ख्वाजाले विज्ञप्तीमार्फत काठमाडौंमा भएको घटनाक्रमबाट खुसी भएको बताएका छन् । जुन आइसिसीको नेतृत्वमा तीन वर्ष देखि गरिएको नेपालमा एकताबद्ध क्रिकेटको परिणाम रहेको प्रेस विज्ञप्तीमा उल्लेख गरेका छन् । उनले यो घटनाक्रमलाई इतिहासिक भन्दै नेपाली क्रिकेट समर्थक,खेलाडी,प्रंशसक र नेपाल सरकारलाई बधाई दिएका छन् ।

बिशेष गरि वर्तमान अवस्थामा क्यानको जिल्ला,प्रदेश र केन्द्रीय स्तरमा निर्वाचन प्रक्रियाको निरिक्षण गर्ने स्वतन्त्र समिति प्रति विशेष आभारी छु,ख्वाजाले भनेका छन् ,‘ नेपालले पछिल्लो तीन वर्षमा उचाई लिएको छ । ओडीआई मान्यता ,महिलाले विश्वकप छनोट तथा युवा टिमको प्रर्दशन पनि उत्कृष्ट छ ।’

उनले नव निर्वाचित समिति प्रति आशावादी देखिएका छन् । चतुरबहादुर चन्दको अध्यक्षतामा १७ सदस्यीय कार्यसमिति निर्वाचित भएको थियो । ‘ यो सफलतालाई मैदानमा पनि लागु गर्नुहुनेछ भन्ने विश्वास छ । नेपालको आइसिसी सदस्यता निलम्बन फुकुवाको लागि प्रमुख शर्त पुरा भएको छ,’ विज्ञप्तीमा भनिएको छ,‘ अब हामी क्यान निलम्बन फुकुवाको लागि दुबईमा बस्ने बोर्ड बैठकमा छलफल गर्नेछौं ।’