काठमाडौं (हाम्रो खेलकुद)– हालै दुई वटा सिरिज खेलेर फर्केको नेपाली क्रिकेट टोलीको टि ट्वान्टी वरियता २ स्थान खस्केको छ । अन्तर्राष्ट्रिय क्रिकेट परिषद् (आइसिसी) ले दुई दिन अघि सार्वजनिक गरेको वरियतामा नेपाल १३ औं स्थानमा पुगेको छ । यसअघि नेपाल ११ औं स्थानमा थियो ।

नेपाली टोली ५ देश सम्मिलित टि ट्वान्टी सिरिज खेलेर शुक्रबार स्वदेश आइपुगेको थियो । जहाँ ४ मध्ये २ खेलमा जित निकालेको नेपाली टोलीले २ खेलमा हार बेहोरेको थियो । हङकङ र नेदरल्यान्ड्सलाई हराएको नेपाल आयरल्यान्ड र ओमानसँग पराजित भएको थियो । सिरिजमा ओमान पहिलो, आयरल्यान्ड दोस्रा र नेपाल तेस्रो स्थानमा रह्यो ।

त्यसअघि सिंगापुरमा त्रिकोणात्मक टि ट्वान्टी सिरिजमा नेपाल दोस्रो भएको । जहाँ जिम्बावे पहिलो र नेपाल दोस्रो भएको थियो । जिम्बावेसँगको नेपालले दुवै खेल गुमाएको थियो । नेपालले सिंगापुरलाई एक खेलमा हराएको थियो । अर्को खेल भने वर्षाका कारण रद्द भएको थियो ।

टि ट्वान्टीका पछिल्ला २१ खेलमा नेपालले १ सय ९० रेटिङका साथ ३ हजार ९ सय ९२ अंक प्राप्त गरेको छ । ८५ राष्ट्र समावेश वरियताको शीर्षस्थानमा पाकिस्तान, दोस्रो स्थानमा इंग्ल्यान्ड, तेस्रोमा दक्षिण अफ्रिका, चौथोमा भारत र पाँचौंमा अष्ट्रेलिया रहेको छ ।