काठमाडौं (हाम्रो खेलकुद) – नेपाल क्रिकेट संघ (क्यान) माथि अन्तर्राष्ट्रिय क्रिकेट परिषद् (आइसिसी) को निलम्बन भएको झन्डै साढे तीन वर्ष बितिसकेको छ । निलम्बन पछि अनेक प्रयास पछि अन्ततः असोज १० र ११ गते काठमाडौं आइसिसीकै प्रत्यक्ष निगरानीमा निर्वाचन पनि सम्पन्न भइसकेको छ ।

सो निर्वाचनले चतुरबहादुर चन्दको अध्यक्षतामा १७ सदस्यीय कार्यसमिति चयन भएको थियो । आइसिसीले निर्वाचनलाई निलम्बन फुकुवाको पहिलो शर्त पुरा भइसकेको प्रेस विज्ञप्तीमार्फत जानकारी गराइसकेको छ । अब नेपाली क्रिकेटकर्मी र समर्थक आज हुने आइसिसीको बोर्ड बैठकको निर्णयको पर्खाइमा छन् । आज हुने भनिएको बोर्ड बैठकले निलम्बन फुकुवा गर्ला त ? भन्ने सबैको चासो रहेको छ ।

आइसिसीको बैठक बस्ने भनिएपनि समयका बारेमा जानकारी नभएको क्यानका नव निर्वाचित सचिव अशोकनाथ प्याकुरेलले बताएका छन् । सचिव प्याकुरेल बोर्ड बैठकले केहि सम्बोधन गर्ने सम्भावना भएपनि निलम्बन फुकुवाको लागि समय लाग्न सक्ने अनुमान गरे ।

‘आइसिसीका पदाधिकारीसँग अनौपचारिक कुराकानी भइरहेको छ । निलम्बन फुकुवाका लागि निर्वाचन लगायतका अन्य शर्त पनि थिए,’ उनले भने, ‘पहिलो र ठूलो शर्त निर्वाचनको प्रक्रिया सकिएको छ । अब विस्तारै काम गर्दै अघि बढ्ने र अन्य काम पनि सन्तोषजक भएपछि आइसिसीले निलम्बन फकुवा पक्कै गर्छ भन्ने हाम्रो विश्वास हो । तर आजैको बैठकले निलम्बन फुकुवा नगर्न सक्छ ।

निर्वाचनसहित पारदर्शिता र चुस्त व्यवस्थानलाई पनि आइसिसीले शर्तका रुपमा राख्दै आएको छ । २०७२ को मंसिरमा क्यानको निर्वाचनले चन्दलाई नै अध्यक्षका रुपमा निर्वाचित गरेपछि पछिल्लो विवाद सुरु भएको थियो ।

पुषमा राष्ट्रिय खेलकुद परिषद् (राखेप) ले क्यान पूर्नगडन गरेपछि विवादले नयाँ रुप लिएको थियो । निर्वाचत समिति अदालत गएपछि क्यानको दोहोरो अस्तित्व देखिएको थियो । नेपालको अन्तरिक विवादकाबीच आइसिसीले २०७३ वैशाखमा क्यानमाथि प्रतिबन्ध लगाएको थियो ।