सिड्नी (हाम्रो खेलकुद) – सगरमाथा क्रिकेट क्लब, मेलबर्नको आयोजनामा आइतबारदेखि सुरु भएको रिचा स्मृति क्रिकेट प्रतियोगितामा आयोजकको दुवै टोलीले जित दर्ता गरेको छ ।

दिनको पहिलो खेलमा सगरमाथा ब्रिलियन्टले द हिमालयन क्लबलाई ४ विकेटले पराजित गर्यो । पहिलो ब्याटिङ गरेको हिमालयनले निर्धारित २० ओभरमा अलआउट हुनुअघि १ सय १६ रन जोडेको थियो । जवाफमा ब्रिलियन्टले ६ विकेट गुमाउँदै १९ औं ओभरमा लक्ष्य पूरा गर्यो । खेलका म्यान अफ द म्याच बनेका ब्रिलियन्टका भुषण श्रेष्ठले ३ विकेट लिनुका साथै नटआउट ३० रन जोडे ।

सगरमाथाको अर्को टोली सगरमाथा ‘ए’ ले गोर्खाली क्रिकेट क्लबलाई ८१ रनले हरायो । पहिलो ब्याटिङ गर्ने क्रममा सगरमाथा ‘ए’ ले म्यान अफ द म्याच बनेला दिपेन रायमाझीको ७५ रनको सहयोगमा २० ओभरमा ७ विकेट गुमाउँदै १ सय ८१ रन जोड्यो । जवाफमा गोर्खालीले २० ओभरमा ९ विकेट गुमाउँदै १ सय रनमात्र बनाउन सक्यो ।

रोयल राइनोज क्रिकेट क्लब ‘ए’ ले एक्स्पर्ट क्रिकेट क्लबलाई ७ विकेटले पराजित गर्यो । रोयलका लागि ३ विकेट लिएका युत्सब पोखरेल खेलका म्यान अफ द म्याच भए । त्यस्तै अर्को खेलमा नार्रेले रोयल राइनोज क्रिकेट क्लब ‘बी’ लाई पराजित गरेको थियो । खेलमा ४३ रन जोडेका किरण कडेल म्यान अफ द म्याच भए ।

दोस्रो चरणको खेल अर्को आइतबार हुनेछ । समुह चरणका शीर्ष २ टोली सेमिफाइनलमा प्रवेश गर्नेछन् । फाइनल खेल १७ नोभेम्बरमा हुनेछ । प्रतियोगिता क्यानका पूर्व उपाध्यक्ष नरेश श्रेष्ठकी छोरी रिचा श्रेष्ठको स्मृतिमा आयोजना गरिएको हो ‌। उनको केहि महिनाअघि निधन भएको थियो ।