काठमाडौं (हाम्रो खेलकुद) – काठमाडौंमा वुधबार सुरु हुने वुमन्स च्याम्पियन्स लिग (डब्लुसिएल) टि ट्वान्टी क्रिकेट प्रतियोगिताको विजेताले ७ लाख रुपैयाँ पाउने भएको छ । आयोजक क्विन्स इभेन्ट्स म्यानजमेन्ट प्रालिले सोमवार एक प्रेस विज्ञप्ती जारी गर्दै पुरस्कार राषि घोषणा गरेको छ ।

विजेताले ७ लाख प्राप्त गर्दा उप विजेताले ३ लाख पाउने छ । त्यस्तै ब्यक्तिगत विधातर्फ प्रतियोगिताको सर्वोत्कृष्ट खेलाडी (म्यान अफ द सिरिज) ले १ सय २५ सिसिको टिभिएस स्कुटर सहित ५० हजार प्राप्त गर्ने छन् । त्यस्तै प्रतियोगिताको उत्कृष्ट बलर र ब्याट्सम्यानले २५-२५ हजार प्राप्त गर्ने आयोजकले जनाएको छ ।

प्रत्येक खेलको म्यान अफ द म्याचले रु ५ हजार पाउने छन् । ५ टोलीको सहभागितामा डब्लुसिएल असोज २९ देखि कात्तिक ७ गते सम्म कीर्तिपुरस्थित त्रिभुवन विश्वविद्यालयको मैदानमा हुने छ । राउण्ड रोविनको आधारमा हुने प्रतियोगितामा ललितपुर फाल्कोन्स,पोखरा पल्टन,क्याट क्विन्स काठमाडौं,चितवन राइनोज र विराटनगर टाइन्टस गरि ५ टोली छन् ।

राष्ट्रिय महिला टोलीकी सदस्य एवंम् पूर्व कप्तान नेरी थापा ललितपुरकी मार्की खेलाडी हुन् । त्यस्तै पोखरामा सिता रानामगर,काठमाडौंमा राष्ट्रिय टोलीकी कप्तान रुविना क्षेत्री,चितवनमा इन्दु बर्मा र विराटनगरमा सरिता मगर मार्की खेलाडी रहेका छन् । उद्घाटन खेल असोज २९ गते क्याट क्विन्स काठमाडौं र चितवन राइनोजबीच प्रतिस्पर्धा हुने छ ।