काठमाडौं (हाम्रो खेलकुद) – वुमन्स च्याम्पियन्स लिग (डब्लुसिएल) टि ट्वान्टी क्रिकेट प्रतियोगिताको ट्रफि सार्वजनिक भएको छ । आयोजक क्विन्स इभेन्ट्स म्यानजमेन्ट प्रालिले मंगलबार काठमाडौंमा एक कार्यक्रम गरि ट्रफि सार्वजनिक गरेको हो ।

ट्रफि सार्वजनिक कार्यक्रममा पाँच टोलीमा पाँच मार्की खेलाडी नेरी थापा,सिता राना मगर,सरिता मगर,इन्दु बर्मा र रुबिना क्षेत्री सहभागि थिए । डब्लूसिएल बुधबार देखी कात्तिक ७ सम्म टियु मैदानमा चल्ने छ ।

जसमा ललितपुर फाल्कोन्स, पोखरा पल्टन, क्याट क्विन्स काठमाडौं, चितवन राइनोज र विराटनगर टाइन्टस रहेका छन् । राष्ट्रिय महिला टोलीकी सदस्य एवंम् पूर्व कप्तान नेरी थापा ललितपुरकी मार्की खेलाडी हुन् ।

पोखरामा सिता रानामगर, काठमाडौंमा राष्ट्रिय टोलीकी कप्तान रुविना क्षेत्री, चितवनमा इन्दु बर्मा र विराटनगरको सरिता मगर मार्की खेलाडी हुन् ।

उद्घाटन खेलमा बुधबार क्याट क्विन्स काठमाडौं र चितवन राइनोजबीच प्रतिस्पर्धा हुने छ । राउण्ड रोविनको आधारमा हुने प्रतियोगितामा सबै टोलीले एक अर्कासँग खेल्ने छन् । जसबाट शीर्ष स्थानमा रहने टोली स्वतः फाइनलमा पुग्ने छ । दोस्रो र तेस्रो स्थानको टोलीले फाइनल प्रवेशको लागि क्वालिफयार खेल्नुपर्ने हुन्छ । पुछारका दुई टोली समुह चरणबाटै बाहिरिने छन् ।

विजेता टोलीले ७ लाख प्राप्त गर्दा उप विजेताले ३ लाख रुपैयाँमा चित्त बुझाउने छ । त्यस्तै ब्यक्तिगत विधातर्फ प्रतियोगिताको सर्वोत्कृष्ट खेलाडी (म्यान अफ द सिरिज) ले १ सय २५ सिसिको टिभिएस स्कुटर सहित ५० हजार प्राप्त गर्ने छन् । त्यस्तै प्रतियोगिताको उत्कृष्ट बलर र ब्याट्सवुमेनले समान २५-२५ हजार प्राप्त गर्ने आयोजकले जनाएको छ ।

प्रत्येक खेलमा ओमन अफ द म्याच खेलाडीले ५ हजार रुपैया प्राप्त गर्नेछन् । ५ टोलीको सहभागितामा डब्लुसिएल असोज २९ देखि कात्तिक ७ गते सम्म कीर्तिपुरस्थित त्रिभुवन विश्वविद्यालयको मैदानमा हुने छ ।

उद्घाटन खेलमा बुधबार क्याट क्विन्स काठमाडौं र चितवन राइनोजबीच खेल हुने छ ।