काठमाडौं (हाम्रो खेलकुद) – नेपाली राष्ट्रिय क्रिकेट टोलीका सर्वाधिक सफल कप्तान पारस खड्काले कप्तान पदबाट राजिनामा दिएका छन् । मंगलबार सामाजिक सञ्जालमार्फत पारसले कप्तानी छोडेको सार्वजनिक गरेका हुन् ।

सन् २००४ मा मलेसियाविरुद्ध डेब्यू गरेका पारसले २००९ मा कप्तानको जिम्मेवारी पाएका थिए । अन्तर्राष्ट्रिय क्रिकेट परिषद (आईसीसी) ले सन् २०१६ मा लगाएको प्रतिबन्ध सोमवार मात्र ससर्तरुपमा फुकुवा गरेको थियो । प्रतिबन्ध फुकुवाको २४ घण्टा बित्न नपाउँदै पारसले संघले नयाँ विन्दुबाट सुरुवात गर्नबाटो खोलेको इंगित गर्दै कप्तानी पद छाडेका हुन् । यद्यपि उनको राजीनामासँगै संघ र खेलाडीबीच सम्बन्धमा चिसोपना आएको हो की भन्ने प्रश्न उठेको छ ।

राजीनामा दिएपछि पत्रकार सम्मेलनमा बोल्दै आफूले जिम्मेवारी राम्रो ढंगले पूरा गरेको विश्वास व्यक्त गरे । ‘नेपाल क्रिकेट माथि बढ्ने हो भने व्यक्तिगत स्तरबाट उठेर अगाडी आउन आवश्यक छ । नयाँ चुनौती छ । आशा गरौं सबैले आ–आफ्नो जिम्मेवारी पुरा गर्नुपर्छ । कप्तान को बन्छ मेरो निर्णय हुँदैन । मलाई बनाउँदा पनि तपाई कप्तान बन्दै हुनुहुन्छ तयार हुनु भनेर भनिएको पनि थिएन । मलाई क्रिकेट संघले २००९ मा कप्तानको जिम्मेवारी दियो र मैले इमान्दरीका साथ पूरा गर्न प्रयास गरें,’ पारसले पत्रकार सम्मेलनमा भने ।

पारसले आफ्नो उत्तराधिकारी छनोटले आफ्नो खेलमा असर नपर्ने बताए । ‘अब कप्तान को बन्छ भन्नेमा क्यानका पदाधिकारी र प्रशिक्षकबीच छलफल हुने नै छ । कप्तान जो बनेपनि नेपालको जित हुनुपर्छ । म कप्तान भएर मात्र नेपाली क्रिकेट यो स्थानमा आएको पनि होइन । म नहुँदैमा खत्तम हुन्छ भन्ने पनि हुदैन,’ पारसले भने ।

पारसले नेपाली क्रिकेट यस स्थानसम्म आइपुग्नुमा खेलाडी र प्रशिक्षकको मुख्य हात रहेको प्रष्ट पारे । ‘खेलाडी र प्रशिक्षकको सहयोगले लामो यात्रा तय गरेका हौँ । रोय डासदेखि पुबुदु दासानायाके, जगत टमाटा हुँदै उमेश पटवाल सम्म सबै यसका सारथी रहे । उहाँहरुकै मार्गदर्शनले हामीले सफल यात्रा तय गर्न सक्यौं,’ उनले थपे ।

उनले अबको दिनमा खेलाडीका रुपमा नै राष्ट्रिय टोलीबाट निरन्तर खेल्ने इच्छा व्यक्त गरे । ‘क्रिकेटलाई माथि पुर्याउन खेलाडीको मिहिनेतले मात्र पुग्दैन, नयाँ नेतृत्व आएको छ । उहाँहरुलाई कप्तान छान्ने जिम्मेवारी छ । क्रिकेट छोडीहाल्ने होइन नेपालबाट अझैं पनि खेल्ने इच्छा छ । त्यसको लागि थप मिहिनेत गर्नेछु । यहाँसम्म साथ दिनुहुने सबैलाई धन्यवाद दिन चाहन्छु,’ पारसले भने ।

नयाँ नेतृत्वसँग बेखुस भएर पद छाडेको भन्ने विषयमा कप्तान पारसले कुनै किसिमको वार्तालाप नभएको बताए । ‘क्यानको नयाँ नेतृत्वसँग मेरो कुरा भएको छैन । प्रतिबन्ध भएदेखि कसैसँग पनि कुरा भएको छैन । पुबुदु सर हुँदादेखि हामीले धेरै कुरा सामना गरिसकेका छौं र त्यो अब त्यस अवस्थालाई नसम्झौं,’ उनले थपे, ‘पारस खड्का नेपाली क्रिकेट होइन । मेरो सपना पनि थिएन नेपालको लागि खेल्ने । मैले मौका पाएँ । म भाग्यमानी थिएँ त्यसैले सहि ठाउँमा प्रर्दशन गरें र यो स्थानमा छु । अहिले नेपाली क्रिकेटसँग सबै स्रोत छ । त्यसलाई प्रयोग गर्न पदाधिकारीले सक्नुपर्यो । अहिलेको अवस्थाबाट हामीले लामो यात्रा तय गर्न सक्छौं ।’

पारसले पदबाट राजीनामा दिन सहि समय लागेकोले नै निर्णय लिएको बताए । ‘मैले सोचें यो सहि समय हो । नयाँ सोच र संरचनाका साथ हामी अघि बढ्दै छौं । आगमी फेब्रुअरीमा ओमान र अमरिकासँग घरेलु मैदानमा त्रिकोणात्मक सिरिज खेल्दैछौं । पारस खड्का कप्तान भएर, सन्दीप लामिछानेले बलिङ गरेर र ज्ञानेन्द्र मल्लले रन हानेर नेपालले जित्छ भन्ने पक्का छैन,’ उनले भने ।

उनले नयाँ नेतृत्वले आग्रह गरेपनि कप्तान पदमा नफर्कने प्रष्ट पारे । ‘क्यानले आग्रह गरेपनि पुन: कप्तान बन्न सक्दिन । यदि म खेलें भने खेलाडीको रुपमा खेल्ने छु । आफ्नो तर्फबाट सल्लाह सुझाव दिन सक्छु । मैले देशलाई खेल जिताउन सक्छु । अबको मेरो जिम्मेवारी भनेको खेलाडीका रुपमा हो । संघ बलियो नभईकन खेलाडीले जोडजाड गरेर यहाँसम्म आईपुग्यौं । जोडजाड गरेको घरलाई बलियो बनाउने हो भने सबैको सहयोग चाहिन्छ ।
इमान्दार भएर मैले प्रयास गरेको हुँ । क्रिकेटले नै मलाई सबै दिएको छ । जुन मैले सपनामा पनि सोचेको थिइनँ, ‘ पारसले भने ।

ओडीआई स्टाटस र टि ट्वान्टी विश्वकप आफ्नो कप्तानीमा ठूलो सफलता भएको बताउने पारस खराब नतिजा भने प्रत्यक खेलको हार रहेको बताउँछन् । ‘एक महिना अघि टि ट्वान्टी एसिया छनोटको प्रर्दशन होस् वा ओमानसँग टि ट्वान्टी सिरिजमा, हरेक खेल हार्दा मेरो खराब दिन थिए । सबैभन्दा बढि खुसी विश्वकप खेल्दा रहेको थियो भने ओडीआई मान्यता पाउनु सफल क्षण थियो । मभित्र सधैं क्रिकेट रहीरहने छ,’ उनले भने । नेपाललाई एकदिवसीय विश्वकपसम्म पुर्याउन नसकेको बताउने पारसले आफ्नो उत्तराधिकारीका रुपमा भने ज्ञानेन्द्र मल्ल उचित रहेको व्यक्तिगत धारणा प्रस्तुत गरे ।