सुनील गाउँले,सिमरा

बारामा सुरु भएको महागढिमाई कप टि ट्वान्टी क्रिकेट प्रतियोगितामा वीरगञ्ज युथ क्रिकेट क्लबले विजयी सुरुवात गरेको छ । महागढिमाई नगरपालिकास्थित क्रिकेट मैदानमा बुधबार भएको उद्घाटन खेलमा आयोजक महागढिमाई स्पोर्टस क्लबलाई ८५ रनले हराउँदै वीरगञ्जले सुखद सुरुवात गरेको हो ।

१० ओभरमा छोट्याइएको खेलमा टस जितेर ब्याटिङ रोजगको वीरगञ्जले ४ विकेटको क्षतिमा १ सय ३६ रन बनाएको थियो । वीरगञ्जका लागि ओपनर अलियाश मंसूरीले ४५ र समिम अंसारीले ४३ रनको योगदान दिए । विरेन्द्र चौधारी र नकेशले १/१ विकेट लिए । १ सय ३७ रनको लक्ष्य पछ्याएको आयोजक महागढिमाईले १० ओभरमा २ विकेट गुमाउँदा ५२ रन मात्र बनाउन सक्यो ।

दोश्रो खेलमा हेटौंडाको महाविर क्रिकेट क्लबले बाराको कलैया क्रिकेट क्लबलाई १ विकेटले पराजित ग¥यो । राष्ट्रिय क्रिकेट टिमका खेलाडी सहित पिचमा आएको कलैयाको व्याटिङ घरेलु मैदानमा चल्न सकेन । टस जितेर ब्याटिङ रोजेको कलैयाले निर्धारित २० ओभरको खेलमा सबै विकेट गुमाउँदै ७२ रन मात्र जोड्न सक्यो ।

रसका लागि रभि शाहले २६,सिनियर टोलीमा ओपनर पवन सरार्फ ९,तिर्थराज दास डक र अनिल शाह १० रनमा आउट भए । ७३ रनको लक्ष्य पछ्याएको हेटौंडाले १५ ओभरमा ९ विकेटको क्षतीमा लक्ष्य भेट्यायो । हेटौंडाको जितमा नायक बनेका रामनरेश गिरी खेलको म्यान अफ दि म्याच घोषित भए ।

कलैयालाई सस्तैमा समेट्ने क्रममा रामनरेशले ४ ओभरमा २८ रन खर्चेर ह्याट्रिक सहित ५ विकेट लिएका थिए । नेपाली राष्ट्रिय क्रिकेट टोलिका पवन सर्राफ, अनिल साह, तथा यु–१९ राष्ट्रिय टिमका रवि साह र प्रितराज दास जस्ता खेलाडीलाई पिचमा उतारेपनि हेटौंडाका सामु कलैया नीरिह बनेको थियो ।

लेट्स प्ले स्पोर्टसको आयोजना तथा नेक्सस् क्रिकेट एकेडेमीको व्यवस्थापनमा जारी प्रतियोगिताको विजेताले दूई लाख तथा उपविजेताले एकलाख सहित ट्रफि प्राप्त गर्ने प्रतियोगिताका निर्देशक प्रवल गौतमले जानकारी दिए । प्रतियोगितामा ६ टिमको सहभागिता रहेको छ । यसअघि प्रतियोगिताको उद्घाटन महागढिमाई नगरपालिकाका मेयर उपेन्द्रप्रसाद यादवले गरेका थिए ।