काठमाडौं(हाम्रो खेलकुद) – वुमन्स च्याम्पियन्स टि ट्वान्टी क्रिकेट लिग प्रतियोगिताकोे तेस्रो खेलमा ललितपुर फाल्कोन्सले विराटनगर टाइन्टसलाई १ सय २३ रनको मध्यम लक्ष्य दिएको छ ।

विहीबार टियु क्रिकेट मैदानमा टस हारेर ब्याटिङको निम्तो पाएको ललितपुरले निर्धारित २० ओभरमा ७ विकेट गुमाउँदै १ सय २२ रन बनायो । ललितपुरका लागि ममता चौधरीले सर्वाधिक २८ रनको योगदान दिइन् ।

१७ ओभरको पाँचौ बलमा रन आउट हुनुअघि उनले २४ बलमा ३ चौका प्रहार गरिन् । ललितपुरका ५ खेलाडी रन आउटको शिकार बनेका थिए । दोस्रो ओभरको पाँचौ बलमा ओपनर सरिता दिसवा मगर १ रनमा रन आउट भएकी थिइन् ।

कप्तान नेरी थापा पनि पाँचौ ओभरको चौथो बलमा ४ रनमा आउट हुन पुगिन् । नवौं ओभरको अन्तिम बलमा सवनम राइले ओपनर रोशनी बोहरालाई ९ रनमा आरती बिडारीबाट क्याच आउट गराएपछि ललितपुर दबाबमा परेको थियो ।

दशौं ओभरको पाँचौ बलमा शान्ती चौधरी पनि ९ रनमा रन आउट हुन पुगिन् । ११ ओभरको अन्तिम बलमा कविता जोशीलाई आरती बिडारीले १ रनमा बोल्ड आउट गरेपछि ललितपुर ४७(५को कमजोर अवस्थामा पुगेको थियो ।

तल्लोक्रममा करुणा भण्डारीले १८ बलमा समान १ चौका र छक्का सहित २१ रन जोड्दै इनिङ उकासिन्् । करुणा पनि रन आउटको शिकार बनिन् । तल्लोक्रममा सम्झन खड्का र कृती सेन समान १३ रनमा अविजित रहे । विराटनगरका लागि समनम राइ र आरती विडारीले समान १ विकेट लिए ।