काठमाडौं (हाम्रो खेलकुद)– अन्तर्राष्ट्रिय क्रिकेट परिषद् (आइसिसी) को निलम्बन फुकुवा भएपछि नयाँ परिस्थितिका बारेमा छलफल गर्न नेपाल क्रिकेट संघ (क्यान) को बैठक अर्को साता बस्ने भएको छ । झन्डै साढे ३ वर्षको निलम्बन आइसिसीले सोमबार फुकुवा गरेको थियो ।

त्यसता क्यानको पहिलो बैठक बस्न लागेको हो । असोज ११ गते निर्वाचित कार्यसमितिको आइतबार बस्ने दोस्रो बैठक हो । यसअघि निर्वाचन सम्पन्न भएकै दिन कार्यसमितिको बैठक बसेको थियो ।

आइसिसीले निलम्बन फुकुवा गरेकै विषय बैठकको मुख्य एजेन्डा रहेको क्यानका सचिव अशोकनाथ प्याकुरेलले बताएका छन् । ‘बैठकमा मुख्यतः नयाँ परिस्थितिका बारेमा छलफल हुनेछ । आइसिसीलाई धन्यवाद दिनेछौं,’ उनले भने,‘ त्यसबाहेक अब कसरी अघि बढ्ने । दैनिक काम सञ्चालनका लगि विषयमा पनि हामीले छलफल गरेर जानु पर्नेछ । ’

क्यानको निर्वाचित कार्यसमितिले औपचारिक काम सुरुवात गर्नका लागि आइसिसीको बैठकको निर्णय कुरेको थियो । फुकुवाको निर्णय आइसकेपछि अब गतिविधि र कार्यालय सञ्चालनका विषयमा पनि बैठकमा छलफल हुने सचिव प्याकुरेलले हाम्रो खेलकुदलाई बताए ।

सचिव प्याकुरेलले देश भित्र राष्ट्रिय खेलकुद परिषद् (आइसिसी) र अन्तर्राष्ट्रिय रुपमा आइसिसीसँगको सहकार्यमा नै क्यानले आफ्ना कामलाई अघि बढाउने प्रष्ट पारका छन् । उनले भने ‘ अब काम गर्ने बेला हो । हामी सहकार्य गर्दै नयाँ ढंगले अघि बढ्नेछौं । आइसिसीले पनि बिहीबार सम्म पनि निर्णय र प्रेस विज्ञप्तीमा भनिएको शर्तहरु पठाइसकेको छैन ।

‘आइसिसीले केहि दिनमा पत्र पठाउने भन्ने जानकारी दिएको छ । अहिले सम्म आइसकेको छैन,’ सचिव प्याकुरेलले भने,‘ आइसिसीसँग भएका केहि अनौपचारिक कुराकानीलाई हामी छलफलमा राख्नेछौं ।’ आइसिसीले सशर्त निलम्बन फकुवा गरेको निर्णय गरेको थियो । तर शर्त भने उल्लेख गरेका थिएन ।

पारसको राजिनामाको चर्चा हुने
आइसिसीबाट निलम्बन फुकुवा भएको भोली पल्ट मंगलबार पारस खड्काले राष्ट्रिय क्रिकेट टोलीको कप्तान पद त्यागको घोषणा गरेका थिए । तर, क्यानले भने औपचारिक रुपमा उनको राजिनामाको जानकारी प्राप्त नभएको बताउँदै आएको छ ।

‘पारसको राजिनामका विषयमा औपचारिक जानकारी आएको छैन ,’ क्यान सचिव प्याकुरेलले भने,‘ औपचारिक रुपमा आयो भने त्यहि अनुरुप छलफल गर्नेछौं । नआएमा पनि सञ्चारमाध्यमका आएका समाचारका आधारमा पनि हामी अनौपचारिक छलफल भने गर्नेछौं ।’

पारसले निर्वाचित क्यानका पदाधिकारीले निर्णयमा पुर्नविचार गर्न आग्रह गरेको जनाउँदै भने,‘ उहाँहरुले भन्ने उहाँहरुको अधिकार हो । तर, यो मेरो व्यक्तिगत निर्णय भएकाले यसमा पुर्नविचार हुँदैन ।’