काठमाडौं(हाम्रो खेलकुद) – वुमन्स च्याम्पियन्स टि२० लिग क्रिकेट प्रतियोगितामा ललितपुर फाल्कोन्स चितवन राइनोजसँग लज्जास्पद हार बेहोरेको छ ।

शुक्रबार टियु क्रिकेट मैदानमा ललितपुर चितवनसँग ८९ रनले पराजित भएको हो । १ सय ३६ रनको विजयी लक्ष्य पछ्याएको ललितपुर १७.१ ओभरमा अल आउट हुँदै ४६ रनमा समेटियो ।

ललितपुरको लागि कप्तान नेरी थापाले सर्वाधिक १७ रनको योगदान दिइन् । ललितपुरका लागि १० ब्याटरले दोहोरो अंकमा रन जोड्न सकेनन् । ललितपुरले ओपनर कृती शेनलाई १ रनमा गुमाएको थियो । शेनलाई रितु कनौजियाले दोस्रो ओभरको चौथो बलमा बोल्ड आउट गरिन् । कनौजियाले अर्की ओपनर रोशनी बोहरालाई २ रनमा बोल्ड आउट गरिन् । कविता जोशी ८, ममता चौधरी ३, करुणा भण्डारी डक र गिता जोशी ३ रनमा आउट भएपछि ललितपुरको जितको संभावना टाढिएको थियो ।

चितवनको सहज जितमा कविता गौतमले २ ओभरमा ११ रन खर्चेर २ विकेट लिइन् । रितु कनौजियाले ३ ओभरमा ९ रन खर्चेर २ विकेट लिइन् । सुमन खतिवडा र रेखा रावलको नाममा समान १ विकेट रह्यो ।

त्यसअघि टस हारेर ब्याटिङ थालेको चितवन २० ओभरमा ३ विकेट गुमाउँदै १ सय ३५ रन जोडेको थियो। अनुभबी ब्याटर रितु कनौजियाले ५८ रनको अविजित अर्ध शतकीय इनिङ खेलिन् । कनौजियाले ५५ बलमा ८ चौका प्रहार गरिन् । कनौजियाले १५ ओभरको दोस्रो बलमा कविता जोशीलाई चौका प्रहार गर्दै ३९ बलमा अर्ध शतक पुरा गरेकी थिन् ।

डब्लूसिएलमा यो तेस्रो र कनौजियाको पहिलो अर्ध शतक पर्दछ । प्यारी चौधरी २३ बलमा १ चौका सहित २२ रनमा अविजित रहिन् । चौथो ओभरको अन्तिम बलमा कप्तान नेरी थापाले ओपनर कञ्चन श्रेष्ठलाई बोल्ड गर्दै शूल्यमा पेभिलिएन फर्काइन् ।

८ औं ओभरको पहिलो बलमा करुणा भण्डारीले अर्की ओपनर काजल श्रेष्ठलाई १५ रनमा क्याच आउट गरिन् । १२ ओभरको अन्तिम बलमा नेरीले कप्तान इन्दु बर्मालाई १० रनमा एलवी डब्लू आउट गरिन् । ललितपुरका लागि कप्तान नेरी थापाले ४ ओभरमा २० रन खर्चेर २ विकेट लिइन् । करुणा भण्डारीको नाममा १ विकेट रह्यो ।

चितवनले पहिलो खेलमा क्याट क्विन्स काठमाडौंलाई ५ विकेटले पराजित गरेको थियो । चितवनले तेस्रो खेल शनिवार पोखरा पल्टनसँग खेल्ने छ । यता ललितपुरको यो लगातार दोस्रो हार हो । ललितपुर पहिलो खेलमा विराटनगर टाइटन्ससँग ४ विकेटले पराजित गरेको थियो । ललितपुरले आइतबार काठमाडौंसँग खेल्ने छ ।