काठमाडौं (हाम्रो खेलकुद) – चितवन राइनोज वुमन्स च्याम्पियन्स लिग (डब्लुसिएल) टि२० क्रिकेट प्रतियोगिताको क्वालिफायरमा प्रवेश गरेको छ ।

शनिवार पोखरा पल्टनलाई ७ विकेटले पराजित गर्दै एक खेल अगावै शीर्ष स्थानमा रहँदै चितवन क्वालिफायरमा प्रवेश गर्ने पहिलो टोली बनेको हो ।

१ सय २८ रनको लक्ष्य पछ्याएको चितवनले १८ ओभरमा ३ विकेट गुमाउँदै पुरा गर्यो । चितवनको जितमा ओपनर काजल श्रेष्ठले ४७ बलमा ५ चौका सहित ५१ रनको अर्ध शतकीय इनिङ खेलिन् । ओपनर कञ्चन श्रेष्ठ र काजलले पहिलो विकेटका लागि १०.४ ओभरमा ७१ रनको साझेदारी गर्दै सहज जित पक्का गरेका थिए ।

अन्जली चन्दले बोल्ड आउट गर्नु अघि कञ्चनले ३४ बलमा २ चौका सहित २९ रन जोडिन् । कप्तान इन्दु बर्मा २३ बलमा ४ चौका सहित २४ रनमा बोल्ड आउट भइन् । इन्दुलाई अन्जलीले १७ ओभरको पाँचौ बलमा बोल्ड आउट गरेकी थिन् । पोखराकी अन्जली चन्दले ४ ओभरमा १९ रन खर्चेर २ विकेट लिइन् ।

त्यसअघि टियु क्रिकेट मैदानमा टस जितेर पहिला ब्याटिङ थालेको पोखराले निर्धारित २० ओभरमा ५ विकेट गुमाउँदै १ सय २७ रन बनायो । पोखराको लागि कप्तान सीता रानामगरले ६५ रनको अविजित अर्ध शतकीय इनिङ खेलिन् । उनले ५१ बलमा अर्ध शतक पुरा गरेकी थिइन् । १९ ओभरको चौथो बलमा सुमन खतिवडालाई चौका प्रहार गर्दै अर्ध शतक पुरा गरेकी थिइन् । सिताले ५६ बलमा ७ चौका र १ छक्का प्रहार गरिन् ।

चौथो ओभरको अन्तिम बलमा रेबती धामी सितासँग रनमा तालमेल गर्न नसक्दा ४ रनमा रन आउट हुन पुगिन् । छैटौं ओभरको दोस्रो बलमा रुबी पोदारलाई रेखा रावलले १ रनमा बोल्ड आउट भइन् । नवौं ओभरको अन्तिम बलमा शिला क्षेत्री ३ रनमा रन आउट भइन् । १४ ओभरको दोस्रो बलमा क्याच आउट हुनुअघि कविता कुवरले १९ बलमा २ चौका सहित १५ रनको योगदान दिइन् ।

अन्जली चन्द ४ रनमा क्याच आउट भइन् । तल्लोक्रममा मञ्जु बोगटीले १६ बलमा समान २ चौका र छक्का सहित २४ रनमा अविजित रहेपछि पोखरा मध्यम योगफल सम्म पुगेको हो । चितवनकी कविता गौतमले ४ ओभरमा २१ रन खर्चेर २ विकेट लिइन् । रेखा रावलको नाममा १ विकेट रह्यो ।

चितवनले पहिलो खेलमा क्याट क्विन्स काठमाडौंलाई ५ विकेटले पराजित गरेको थियो । त्यस्तै दोस्रो खेलमा ललितपुर फाल्कोन्सलाई ८९ रनले पराजित गरेको थियो ।

चितवनले अन्तिम खेल आइतबार विराटनगर टाइटन्ससँग खेल्ने छ । यता पोखराको यो लगातार तेस्रो हार हो । योसँगै पोखराको अघिल्लो चरणको संभावना अंक गणितीय झिनो मात्र बाँकी रहेको छ ।

पहिलो खेलमा पोखरा काठमाडौंसँग ८२ रनले पराजित भएको थियो । त्यस्तै दोस्रो खेलमा विराटनगरसँग ६ विकेटले पराजित भएको थियो । पोखराले अन्तिम खेलमा सोमवार ललितपुर फाल्कोन्ससँग खेल्ने छ ।

पाँच टोली सहभागि यस प्रतियोगिताको शीर्ष टोली स्वतःफाइनलमा प्रवेश गर्ने छ । दोस्रो र तेस्रो स्थानमा रहेको टोली क्वालिफायर खेल्ने छन् । पुछारका दुई टोली समुह चरणबाटै बाहिरिने छन् ।