काठमाडौं (हाम्रो खेलकुद) – सगरमाथा क्रिकेट क्लब, मेलबर्नको आयोजनामा अष्ट्रेलियामा जारी रिचा स्मृति क्रिकेट प्रतियोगिताको दोस्रो आइतबार अन्तर्गत आजको खेलमा एक्स्पर्ट क्रिकेट क्लब, नार्रेले रोयल राइनोज क्रिकेट क्लब, रोयल राइनोज क्रिकेट क्लब र सगरमाथा क्रिकेट क्लब ए विजयी भएका छन् ।

पहिलो खेलमा सगरमाथा ब्रिलियन्ट एक्स्पर्टसँग २१ रनले पराजित भयो । टस हारेर ब्याटिङ थालेको एक्स्पर्टले २० ओभरमा ४ विकेट गुमाउँदै १ सय ५८ रन बनाएको थियो । उसका शिवले १० चौका र २ छक्का सहित ८६ रनमा नट आउट रहे । दिपेश गुरुङले ५० रन जोडे । सगरमाथाका रशिमले १ विकट लिए । १ सय ५९ रनको विजयी लक्ष्य पछ्याएको सगरमाथाले निर्धारित २० ओभरमा ९ विकेट गुमाउँदै १ सय ३७ रन मात्र जोड्न सक्यो । उसका आषिशले २६ र रशिम कंडेलले २१ रन मात्र जोड्न सके । एक्स्पर्टका शिव र नाजुपले समान २ विकेट हात पारे । खेलमा म्यान अफ द म्याच शिव चुनिए ।

अर्को खेलमा नार्रेले गोर्खाली क्रिकेट क्लवलाई १ सय ४१ रनको फराकिलो अन्तरले पराजित गर्यो । टस जितेर ब्याटिङ थालेको नार्रेले २० ओभरमा ४ विकेट गुमाउँदै २ सय ११ रन बनाएको थियो । नार्रेका किरण कंडेलले १२ चौका र ५ छक्का सहित १ सय ९ रन जोड्दै म्यान अफ द म्याच चुनिए । ह्यारी ५८ रनमा अविजित रहे । २ सय १२ रनको लक्ष्य पछ्याएको गोखार्ली क्रिकेट १५.२ ओभरमा अल आउट हुँदै ७० रनमा समेटियो । गोर्खालीका साजनले २० रन जोडे । कृष्णले ३ र सन्देशले २ विकेट लिए ।

त्यस्तै अर्को खेलमा रोयल राइनोज क्रिकेट क्लब(आरआरसीसी) ले द हिमालयन क्रिकेट क्लबलाई ४८ रनले पराजित गर्यो । पहिला ब्याटिङ गर्दै आरआरसीसीले २० ओभरमा ५ विकेट गुमाउँदै १ सय ६७ रन जोडेको थियो । विकास अधिकारी ३६,पुकार भण्डारी ३३ र चन्दले ३८ रन जोडे । द हिमालयनका रोशनले २ विकेट लिए । १ सय ६८ रनको विजयी लक्ष्य पछ्याएको द हिमालयन २० ओभरमा ८ विकेट गुमाउँदै १ सय १९ रन मात्र बनाउन सक्यो । उसका सन्दीपले ४३ र सम्यानले २१ रन जोडे । निरञ्जनले ३ र पुकारले २ विकेट लिए ।

त्यस्तै अर्को खेलमा सगरमाथा क्रिकेट क्लब ए ले रोयल राइनोज क्रिकेट क्लब बी लाई ७ विकेटले हरायो । टस जितेर राइनोज बी ले ब्याटिङ गर्दै २० ओभरमा ८ विकेटको क्षतिमा ८७ रन बनायो । मनोज र अब्दिसले समान १४ रन बनाए । सुनितले ३ र दिपेनले २ विकेट लिए । ८८ रनको लक्ष्य सगरमाथा ए ले ९ ओभरमा ३ विकेट गुमाउँदै पुरा गर्यो । उसको जिमा आषिश जि.सीले ४८ रन जोडे ।

तेस्रो चरणको खेल अर्को आइतबार हुनेछ । समुह चरणका शीर्ष २ टोली सेमिफाइनलमा प्रवेश गर्नेछन् । फाइनल खेल १७ नोभेम्बरमा हुनेछ । प्रतियोगिता क्यानका पूर्व उपाध्यक्ष नरेश श्रेष्ठकी छोरी रिचा श्रेष्ठको स्मृतिमा आयोजना गरिएको हो ‌। उनको केहि महिनाअघि निधन भएको थियो ।